Biznesmeni Nazmi Çangu ka rrëfyer grabitjen dhe dhunën që ka ndodhur ndaj tij nga 10 persona të armatosur dhe të maskuar. Ai ka treguar se ishte në gjumë në momentin që autorët janë futur në banesën e tij në Nikël të Fushë-Krujës.
Çangu ka rrëfyer se është lidhur dhe dhunuar nga autorët të cilët ishin në kërkim të çelësit të kasafortës. Ai tregon se i kanë prerë gishtin dhe i kanë shkaktuar fraktura të shumta në trup. Një prej personave ishte i veshur me uniformë policie, ka treguar biznesmeni.
“Nga 1993-2007 kam punuar në policinë e shtetit dhe pastaj në policinë e Durrësit. Më pas më hoqën për punë partie. Kam shkolluar fëmijët me djersë dhe i bëj thirrje shtetit dhe prokurorit të përgjithshëm dhe ambasadës amerikane se këtu nuk jetohet, kur të vijnë në dorë të shtëpisë, ç’të mendosh për vende të tjera. Bëj thirrje të gjendet autori, më kanë prerë gishtin, më kanë çarë në kurriz, më rrahën, kam fraktura gjithandej. Këtu nuk jetohet më.
Nuk e mbaj mend orën sa ka qenë, ishim për një darkë me familjen dhe kemi ardhur rreth orës 11 të darkës, rreth orës 2 më kanë ardhur 2 vetë në krevat, isha në gjumë dhe më tha policia e shtetit, i hapa sytë dhe kur mu ul njëri kishte një xhup të zi si një xhup polici, dhe tjetri kishte një triko dhe i thashë: Çfarë policie jeni ju, pastaj më vunë automatikun, më gjuajtën sa deshën, u përlesha me dy, më prenë gishtin dhe më kërkuan çelësin e kasafortës, kishin mbyllur brenda dhe kalamajtë. Më goditën në shqelm fytyrën, i kërkova ujë dhe më dhanë sepse mu tha fyti nga gjaku. Kërkuan sërish çelësin e kasafortës. Njëri hipi te rafti, gjeti një qese që kishte te 8 mijë euro, aty mori edhe çelësat, ku ishin edhe çelësat e kasafortës. Kishte dhe një kaçavidë, e hapën dhe morën ca deshën. Kanë qenë 10 vetë. Më thanë jemi 10 vetë, të kemi rrethuar shtëpinë. Edhe familjarët i kanë keqtrajtuar, të gjithë” – tha ai.
10 persona e dhunuan dhe i grabitën 100 mijë euro biznesmenit në Fushë Krujë
Banesa e biznesmenit Nazmi Çangu në Nikël është grabitur gjatë orëve të para të mëngjesit të sotëm. Biznesmeni është lidhur dhe dhunuar nga grabitësit të cilët dyshohet se i kanë marrë rreth 100 mijë euro dhe disa sende me vlerë
Çangu është transportuar në spital pas grabitjes, pasi i kanë prerë njërin gisht dhe e kanë dhunuar brutalisht.
Në dëshminë e tij ai ka deklaruar se njëri prej grabitësve ka qenë me uniformë policie, ndërkohë që thekson se kanë marrë pjesë në grabitje 9 ose 10 persona.
Familja e biznesmenit ka qenë për darkë tek një mik dhe janë kthyer në banesë rreth orës 23:00. Rreth orës 1 të natës një grup prej 10 personash me armë e maska i ka hyrë në banesë, duke i mbyllur familjarët në katin e tretë ndërsa të zotin e shtëpisë e kanë gjetur në një dhomë ku po flinte i vetëm dhe e kanë lidhur me fasheta dhe torturuar për t’i dhënë çelësin e kasafortës që ai mbante në shtëpi.
