“Barrë dhe Bekim” i autores shqiptare me bazë në Zvicër, Shqipe Sylejmani, u promovua për herë të parë në SHBA në Kolegjin e Harvardit pranë komunitetit shqiptaro-amerikan.
Autorja në prezantim të librit, pohoi se është një dedikim ndaj të afërmit të saj, i cili ka humbur jetën.
“Këtë promovim libri ia kushtoj gjyshit tim, i cili ndrroi jetë vetëm një ditë më parë, mirëpo që inspiroi këtë vepër dhe vazhdon të jetojë mes rreshtash të këtij libri dhe në mendjet e lexuesve,” u shpreh Sylejmani.
Ajo ka lindur në 1988 në Prishtinë, Kosovë, por jeton në Zvicër prej moshës 4 vjeçare. Prej 2018-ës, është përfshirë në promovime kulturore si dhe është presidente e asociacionit “Kulturëerkstatt: Techno”. Në librin e saj të parë, novelën ‘Barrë dhe Bekim’, ajo kthehet pas në përvojën e saj të migrimit dhe udhëtimet në vendin amë.
“Eventi ishte tejet mbresëlënës. Mendoj që studentet dhe të ftuarit përfituan nga eventi dhe eksperiencat që Shqipja ndau me ne. Promovimi i librit ishte po aq unik sa dhe libri”, u shpreh Kryetari i Asociacionit të Studentëve Shqiptar në Harvard.
Pjesëmarrësit ndanë mendimet dhe pikëpamjet e tyre mbi çështjet dhe vlerat shqiptare, sfidat e identiteteve paralele, si dhe identifikimin kombëtar.
