Emigrimi, 6 mijë studentë dhe gjimnazistë më pak në sezonin 2021-2022

Në sezonin 2021-2022 u regjistruan 6 052 studentë dhe gjimnazistë më pak se viti i kaluar ku shkaqet kryesore janë emigracioni i lartë dhe rënia e numrit të lindjeve sipas të dhënave nga INSTAT.

Numri i studentëve në programin universitar bachelor pësoi rënie me 2% për sezonin 2021-2022 ose 1530 më pak të rinj se sezoni i kaluar.

Në total në vitin akademik 2021-22, u regjistruan 123,880 studentë në të gjitha programet e arsimit të lartë, duke shënuar një rritje prej 0,1 % krahasuar me 2020-21 e cila është rritur prej numrit më të lartë të studentëve në programet 2-vjeçare dhe regjistrimet në programin Master. Doktoraturat pësuan rënie të lartë këtë vit me 5,7% më pak se sezoni i kaluar.

Në vitin akademik 2021-22, ashtu si edhe vitin e kaluar akademik, studentët duket të preferojnë fushën e studimit “Biznes, administrim dhe ligj”, ku është përqendruar një e katërta e numrit gjithsej të studentëve. Degët të cilat kanë patur numrin më të lartë të rënies janë degët inxhieneri, prodhim dhe ndërtim, degët e “Bujqësi, pyje, peshkim dhe veterinari” me 19,9 % dhe “Arte dhe shkenca humane” me 13,1 %.

Në arsimin e mesëm u regjistruan 103,467 nxënës, duke shënuar një ulje prej 4,2 % ose 4,522 nxënës më pak krahasuar me vitin e kaluar shkollor sipas INSTAT.

Në vitin 2021-22, pjesën më të madhe të nxënësve të regjistruar në arsimin e mesëm e përbëjnë nxënësit e gjimnazit dhe të arsimit të mesëm social-kulturor prej 82,3 %. Ky proporcion ka mbetur pothuaj në të njëjtin nivel përgjatë tre viteve të fundit. Pjesa më e madhe e nxënësve të regjistruar në arsimin e mesëm ndjek arsimin në institucionet arsimore publike (86,6 %). Në rënie është edhe arsimi 9-vjecar i cili ka 8,348 nxënës më pak se sezoni i kaluar 2020-2021.

Në vitin shkollor 2021-22, numri i mësuesve në arsimin publik ka pësuar rënie me 0,1% në krahasim me vitin e kaluar ndërsa numri i mësuesve në arsimin privat është rritur me 5,8%.

Në vitin shkollor 2021-22, numri i mësuesve në arsimin 9 vjeçar është 24.400, ndër të cilët 76,7 % janë gra. Raporti nxënës për një mësues në arsimin fillor publik është 16,1 dhe në atë privat është 14,6. Ndërsa në ciklin e lartë të arsimit 9 vjeçar, raporti nxënës për një mësues në publik është 8,5 dhe në atë privat 7,3.

Numri i mësuesve në arsimin e mesëm është 8.658 prej të cilëve 69,2 % janë gra. Raporti nxënës për një mësues në arsimin e mesëm është 12,8 në arsimin publik dhe 8,3 në atë privat.