“21 Janari” do hetohet nga SPAK, ja si e komenton Gjokutaj

Çështja e vrasjes së 4 qytetarëve në demontsratën e Partisë Socialiste më 21 Janar të vitit 2011 para Kryeministrisë, do të hetohet nga Prokuroria e Posaçme (SPAK). Vendimi është marrë këtë të martë nga Kolegji i Gjykatës së Lartë me trupin gjykues Ilir Panda, Sokol Binaj dhe Sandër Simoni, pas kërkesës së rekursit të bërë nga Rajmonda Nika, e veja e të ndjerit Aleks Nika, një prej viktimave të “21 Janarit”.

Lidhur me këtë zhvillim, u pyet për një koment avokati i Sali Berishës pas seancës në GJKKO këtë pasdite, që rrëzoi kërkesën e kryedemokratit për heqjen e masës së arrestit në shtëpi.

Në përgjigje, ai tha se familja e të ndjerit që mbeti viktimë gjatë demonstratës së 21 Janarit 2011, ka gjithë të drejtën të kërkojë të drejtën e saj, por “kjo e drejtë qëndron në këto parametra deri sa nuk instrumentalizohet nga Edi Rama dhe politika”.

“Familja Nika ka gjithë të drejtën të kërkojë të drejtën e saj, por kjo e drejtë qëndron në këto parametra deri sa nuk instrumentalizohet nga Edi Rama dhe politika. Ministri aktual i Drejtësisë ka bërë një kallëzim në SPAK dhe është vendosur një mos kompetencë për personat Sali Berisha dhe Lulzim Basha. Vendimi i Strasburgut nuk është detyrues për SPAK-un. Gjithë çështja është e parashtruar sepse e tillë është dispozita. Këta ndryshojnë vetëm godinat, mendësia është e njëjtë”, tha ai.