Një tërmet me magnitudë 4.5 Rihter u regjistrua mëngjesin e sotëm në zonën e Bulqizës, ndërsa para dhe pas goditjes kryesore kishte edhe disa lëkundje më të vogla.
Ndërkohë, sipas IGJEUM-it, në24 orët e fundit vetëm në zonën e Bulqizës janë shënuar gjashtë lëkundje sizmike. Lidhur me këtë ka folur sizmologu Rrapo Ormeni , i cili iu kërkon qytetarëve të mos përfshihen nga paniku sepse nuk ka asgjë për t’u shqetësuar. Ai tha se, tërmeti i regjistruar sot në Bulqizë nuk ka lidhje me atë që ndodhi në Durrës në 26 nëntor të 2 viteve më parë, tragjedia me 51 viktima.
“Kjo e sotmja duket se është një goditje kryesore. Tërmetet janë dy tipologji, goditja kryesore ka para dhe pas goditje. Shumica janë pasgoditje. Është tipi i tërmetit që është shoqëruar me paragoditje. Janë procese normale që ndodhin. Ky tërmet është normal, i vogël. Nuk ka lidhje. Është zonë tjetër nuk ka lidhje me zonën e Durrësit. Zona e Bulqizës është e dalluar, bie në çdo vit një tërmet i kësaj madhësie”, u shpreh ai.
Muajin e fundit edhe Greqia është goditur nga disa tërmete të fuqishme, por sizmologu thotë se nuk ka lidhje, pasi Greqia është në pllakën e Egjeut, ne jemi me të Adriatikut.
