Sekretari i Përgjithshëm i PD-së, Gazment Bardhi përsëriti sot se bandat e Elbasanit janë angazhuar për mbledhjen e firmave për thirrjen e Kuvendit Kombëtar. Sipas tij, mbështetësit e Berishës në Elbasan thirrën Flamur Nokën, duke i thënë se nuk mund të bashkëpunonin me bandat e Elbasanit, kur i kishin përballë në zgjedhjet e 25 prillit.
“Janë shumë të shqetësuar nga këto që kanë ndodhur në Elbasan. E kanë thirrur Flamur Nokën për të ndaluar. Nuk mendoj se Flamur Noka i mban të fshehta Sali Berishës. Mbështetësit e Berishës kanë thirrur Nokën duke i thënë ne kemi besuar në këtë lëvizje, distancohemi nga kjo lëvizje se nuk mund të pranojmë kurrë që banda që kemi pasur përballë në zgjedhjet e 25 prillit, se ata u thonë firmos ‘e dimë ne se kush është e mira e PD-së’, këtë i thonë” – tha Bardhi.
Verifikimi i firmave për mbledhjen e Kuvendit Kombëtar ka përplasur palët të cilat kanë interpretime të ndryshme të statutit të partisë. Bardhi theksoi se nuk është dorëzuar asnjë kërkesë, qoftë kjo edhe nga një anëtar i vetëm i Kuvendit Kombëtar për mbledhjen e Kuvendit Kombëtar.
Kujtojmë se mbi tryezën e një konference shtypi të mbajtur të mërkurën në mbrëmje, ish-kryeministri Berisha kishte disa pirgje me shkresa të cilat siç deklaroi ishin formularët e firmosur nga 4200 delegatë të Kuvendit Kombëtar të Partisë Demokratike.
Discussion about this post