Merita Domi i ka bërë apel shtetit që ta ndihmojnë që vajza e saj, së bashku me tre fëmijët që jetojnë në Turqi të kthehet në Shqipëri. Gruaja ka thënë për “FaxWeb” se vajza e saj jeton në Hatay, një ndër zonat e prekura nga tërmeti i fuqishëm, dhe që prej mëngjesit të së hënës po qëndrojnë në makinë pasi situata atje është shumë e rëndë.
“U trondita shumë nga tërmeti. Me thënë të drejtën deri mbrëmë natën mendoja se çfarë mund të bëja unë si nënë.Vajza ime është e martuar, ka tre fëmijë.Vajza më mori menjëherë në telefon pas tërmetit. Fola dhe njëherë pak para mesditës. Unë kam qenë para një viti atje. Nuk e di a ka shqiptarë të tjerë atje. Kërkoj ndihmën e konsulles sonë në Stamboll.
Nuk ka kontaktuar me asnjë nga autoritetet. Ato flenë në makinë që pas tërmetit të fuqishëm. Po rrinë në makinë. Kërkoj nga ju si televizion, nga instancat që mund të ndihmojnë në këtë drejtim për të sjell vajzën më të gjithë fëmijët këtu, pasi atje nuk funksionon asgjë, është dëmtuar shumë infrastruktura. Nëse do ishte e mundur, kjo do ishte mrekulli,”-tha Merita Domi.
Bilanci i viktimave nga tërmeti tragjik që goditi Turqinë e Sirinë është përkeqësuar. Tani raportohet për mbi 5 mijë viktima në total dhe mbi 18 mijë persona të plagosur. E gjithë bota është solidarizuar me këto dy vende dhe kanë dërguar ekipe të kërkim-shpëtimit si edhe ndihma humanitare. Pasgoditjet nuk kanë ‘lënë të qetë’ Turqinë gjatë natës, ndërsa orët e para të mëngjesit u regjistrua një tjetër tërmet 5.6 ballë.
Discussion about this post