Trajneri i njohur Mirel Josa, ka qenë sot i ftuari në emisionin “Panorama Sport” në “Panorama TV”, ku ka folur fillimisht për kombëtaren kuqezi, e pastaj edhe për etapën e tij te Vllaznia dhe largimin nga kuqeblutë.
Tekniku i njohur ka theksuar optimizmin që ka se Shqipëria do të marrë pikë ndaj polakëve, duke shpresuar që trajneri SIlvinjo të mësojë se si duhet ndaluar skuadra e drejtuar nga Fernando Santos falë duelit që luan sot ndaj Republikës Çeke.
“Jam në një moment pauze dhe nuk mund të flas shumë për ekipin kombëtar. Duhet të shohim një herë si do të bëhet, me staf të ri dhe organizim të ri të kombëtares. Normalisht çdo gjë bëhet për të mirë dhe të shohim e më tepër të flasim pas ndeshjes duke parë ndryshimet se e thashë që është një staf i ri. Duke parë ndryshimet dhe çfarë është bërë në krahasim me ekipin e mëparshëm, në individë dhe mënyrë loje.
Gjithmonë kur ndryshohet trajneri e stafi, i riu ka mendimet e veta, strategjinë e tij, mënyrën e lojës së tij. Kështu që me futbollistët mënyra e komunikimit ka të bëjë shumë. Lojtarët shoh që janë të kënaqur me mënyrën e komunikimit dhe entuziazmin që ka dhënë, por duhen parë gjërat në brendësi.
Jam në dijeni që kanë bërë përpjekjet për një miqësore, por nuk duhet të shikojmë shumë këto miqësoret që bëjnë skuadrat se mund të nxjerrin anë pozitiv që duhet t’i ndjekësh për ndeshjet zyrtare pastaj. Unë më tepër shoh që miqësoret janë qoftë harmonizim tekniko-taktik që do të ketë skuadra, si do të luajë, në mbrojtje e sulm. Por kryesorja është gjendja fizike e lojtarëve në këto momente. Me sa di unë ka një gjendje fizike optimale dhe me lojtarët që ka thirrur trajneri për t’i grumbulluar në ndeshjen e parë.
Koha është e shkurtër, se fundja e fundit një trajner do shumë që të përgatitë një skuadër e cila të hyjë direkt në kompeticion zyrtar. Por edhe ndeshja me Poloninë mund të themi se për ne është më tepër pozitive se edhe Polonia ka ndryshuar staf trajnerësh, ka shkuar Fernando Santos me shumë eksperiencë në futbollin europian. Do ta shohim Poloninë sot si do të luajë dhe kjo është shumë pozitive se edhe trajneri do ta shikojë. Pas një ndeshje mos kujtoni se gjërat do të shkojnë përherë në mënyrë pozitive, se një ndeshje nxjerr problematikat e veta. Edhe Polonia ka problematikat e saj, por Polonia mbetet Poloni.
Nuk është problemi se jemi nostalgjikë, se futbolli nuk është nostalgji, por matet me gjendjen aktuale. Me Poloninë jemi ndeshur unë dhe shokët e mi në shtator 1984 dhe kemi dalë 2-2 në Poloni, pastaj erdhën ndeshjet e tjera, humbja në Tiranë 0-1, jemi ndeshur edhe dy herë të tjera. Një herë në Katovice që humbëm 1-0 dhe në Tiranë 0-0. Por kemi luajtur edhe kohët e fundit, nuk kemi pasur rezultate të mira, kujtoj atë humbje 4-1. Por nuk duhet të shohim historinë në këtë drejtim se do të ishim të mundur pa filluar ndeshja. Do të shohim gjendjen e skuadrave aktuale, debutojnë dy trajnerë të rinj, ana pozitive është që Polonia e nis sot dhe mund ta shohim.
Kombëtarja nuk duhet të ndalë vetëm Levandovskin. Ai nuk ka nevojë ta vlerësoj unë, por bëmat që ka bërë e vazhdon të bëjë me Barcelonën. E kemi parë që ka luajtur këtu dhe mund të themi që çdo lojtar i joni mund ta mbulojë qoftë edhe Levandovskin. Varet si bëhet në zonë apo mbulim personal. Do zonë dhe zonë të organizuar, si ai, ashtu edhe të tjerë se kanë lojtarë shumë të rrezikshëm.
Ndryshim nga Reja? Jam dakord me idetë e trajnerit, edhe pse nuk i di në mënyrë të hollësishme. Nga mbrojtja me 3 apo 5, do kalohet me katër mbrapa. Ky është mendimi im pasi ai është një trajner që këto mënyra loje i ka zbatuar vetë kur ka qenë lojtar te Barcelona apo Siti. Kështu që mendoj se do të ketë një farë ndikimi, por nuk do të thotë që kombëtarja do të bëhet si Barcelona apo Siti.
Nuk mund të jap rezultat, mund të them vetëm që kombëtarja jonë nuk do të dalë pa pikë atje sepse është edhe gjendja e optimizmi që ka. Është edhe për problemet që mund të ketë skuadra polake, që kanë situata dëmtimesh. Do të jetë shumë vendimtare ndeshja e sotme që do të ketë në Çeki”, tha ndër të tjera Josa.
/PanoramaSport
Discussion about this post