Brazili është ende në kërkim të një trajneri që të shfrytëzojë në maksimum potencialin gjigand që ka kjo përfaqësuese. Rekordmenët e Kupës së Botës (me 5 triumfe në finale), kanë vuajtur shumë pas edicionit fantastik për ta në 2002, për shkak se trajnerët e afruar për të drejtuar “Selecaon” nuk kanë menduar aspak të bëjnë më solid repartin e mbrojtjes. Megjithatë kjo pritet të ndryshojë me afrimin e një trajneri italian edhe nuk bëhet fjalë për një emër të panjohur.
Carlo Ancelotti duket shumë pranë pankinës së kombëtares së Brazilit. Tekniku italian i impenjuar aktualisht me Realin e Madridit, pritet që në fundin e sezonit aktual të nisë një eksperiencë e cila do të ishte unike në karrierën e tij pasi kurrë më parë nuk ka drejtuar një kombëtare.
Emri i Ancelottit i është propozuar presidentit të Federatës Braziliane të Futbollit, Ednaldo Rodrigues nga Ronaldo “Fenomeni”. Ish-sulmuesi i famshëm ka mjaft ndikim në Konfederatën Braziliane të Futbollit dhe së fundmi pritet që të bëjë një tjetër propozim për Rodrigues. Duke qenë se Juninho është në fundin e mandatit të tij si drejtor teknik, Ronaldo preferon të shikojë në këtë rol Ricardo Kaka.
Fenomeni beson se marrëdhënia e ngushtë e Ancelottit me ish-nxënësin e tij te Milan, aty ku fituan shumë së bashku, do të bënte që kombëtarja e shtetit më të madh të Amerikës së Jugut të kishte shumë përfitime. Në letër, Ancelotti-Kaka duken dyshja e ëndrrave për pesë herë “Los pentacampeones”, megjithatë ende nuk ka asgjë konkrete ku sigurisht objektivi i parë për CBF-në është firma me trajnerin italian.
Discussion about this post