Festim Bexhdili, i dënuar përjetë për rrëmbimin dhe vrasjen e Jan Prengës, i është drejtuar me rekurs Gjykatës së Lartë, ku kërkon prishjen e vendimit të dënimit të tij me burg përjetë për rrëmbim me pasojë vdekjen, dhe më pas zhdukjen e kufomës së Jan Prengës.
Sipas Prokurorisë së Posaçme SPAK, referuar kamerave të sigurisë në ambientet e resortit në pronësi të Altin Hajrit, Bexhdili ka pastruar vendin e krimit, ka gjetur kazmat dhe lopatat, duke kërkuar për vendin ku do groposej trupi, si dhe ka gjetur rroba të pastra për autorët që bën rrëmbimin.
Jan Prenga u rrëmbye mesditën e 17 janarit 2020 pranë banesës së tij, në rrugën ‘London’ në Kamëz.
Prenga u dhunua dhe u fut me forcë në një automjet, dhe pas 11 ditë hetimet e çuan policinë në një resort në Shijak, në pronësi të Altin Hajrit. Sipas SPAK, rrëmbimi i Prengës erdhi për shkak të vjedhjes së një sasie kokaine të mbërritur nga Ekuadori, në portin britanik Portsmouth.
Ka dyshime se Festim Bexhdili, di vendin ku mund të jetë groposur Jan Prenga. Sipas SPAK i pandehuri nuk ka treguar të vërtetën dhe as vendin ku është fshehur trupi i viktimës. Sipas Prokurorisë së Posaçme, Bexhdili nuk ka pranuar të bashkëpunojë, por nga pamjet filmike dhe antenat celulare është vërtetuar se ai ka shkuar në kompleksin “Golden” disa minuta pasi është dërguar i rrëmbyeri dhe është marrë me pastrimin e vendit.
Sipas prokurores, të nesëmen Bexhdili është larguar me një furgon dhe shihet që është me kazmë e lopatë. Për gjetjen e kufomës së tij janë kryer disa herë kërkime nga Policia.
Discussion about this post