Ekipi i A2 CNN dhe disa mediave të tjera është sulmuar dhe janë thyer xhamat e automjeteve të tyre, nga disa persona të maskuar, të cilët dyshohet se kanë qenë të pranishëm edhe gjatë protestave të djeshme, në komunat në veri të Kosovës.
Në lidhje me sulmin ndaj ekipit të A2 CNN në Leposaviç ka folur në një lidhje live gazetari Jul Kasapi, i cili tregoi se si ndodhi ngjarja e rëndë.
Kasapi tha se ishin disa të rinj të maskuar, të cilët i sulmuan me sende të forta dhe me gurë makinën, ndërsa lëshoi edhe një akuzë të fortë për ekipin e KFOR-it, që sipas Kasapit, u largua sapo pa këta persona, dhe nuk u afrua për t’i ndihmuar.
“Ne ishim brenda në makinë, kur na sulmuan me gurë. Pas nesh ishte edhe një tjetër automjet i një televizioni shqiptar. Makinat i kemi parkuar shumë larg komunës së Leposaviçit, megjithatë edhe këtu na kanë sulmuar.
Në çdo komunë ka pasur të tilla incidente të këtij lloji, ku viktimë kanë rënë media të tjera shqiptare. Forcat e KFOR-it qëndronin pranë nesh dhe sapo panë këta persona të maskuar, u larguan. Këtu nuk ka as prezencë policie.
Ishin 4-5 të rinj me maska, me shall që na sulmuan, ndërsa ne ishim të gjithë në makinë brenda”, u shpreh gazetari i A2 CNN, Jul Kasapi.
Discussion about this post