Dega 5 dhe 7 të Partisë Demokratike në Tiranë, kanë reaguar për veprimin e deputetit Agron Shehaj, i cili ishte ditën e sotme në zyrën e Edi Palokës për të verifikuar firmat e delegatëve të këtyre degëve nëse janë reale apo jo.
Në deklaratën e tyre, degët e kanë konsideruar veprimin e Shehajt si një show mediatik dhe se i vetmi interes i tij është protagonizmi personal.
Në deklaratë gjithashtu thuhet se Shehaj nuk e njeh bazën e partisë, as nuk e respekton atë.
“Show mediatik i Agron Shehajt me demokratët konfirmoi se interesi i tij i vetëm është protagonizmi personal. Agron Shehaj dështoi të verifikojë firmat e demokratëve, sepse ai as nuk e njeh bazën e partisë, as nuk e respekton atë. Si drejtues politik i degëve 5 dhe 7 në Tiranë, Agron Shehaj nuk ka bërë asnjë takim me demokratët që prej ditës që u zgjodh deputet. PD në degën 5 dhe 7 në Tiranë e kudo ka vendosmërinë për të mos lënë demokratët në baltë dhe të mos lejojë nëpërkëmbjen e dinjitetit të tyre. Ne jemi në krah të demokratëve dhe interesit të Shqipërisë, me misionin e vetëm për rrëzimon e regjimit të Edi Ramës dhe rikthimin e PD në pushtet” – thuhet në deklaratën e degëve.
Kujtojmë se ditën e sotme, deputeti shehaj ishte në zyrën e Kryetarit të Këshillit Kombëtar të Partisë Demokratike, Edi Paloka, për të verifikuar firmat e delegatëve të degëve 5 dhe 7, nëse janë të vërteta apo jo.
Discussion about this post