Kryeministri Edi Rama gjatë një konference me gazetarët në ambientet e Kryeministrisë, u shpreh se “përplasjet fatale mes grupeve që operojnë në Veri të Kosovës, mund të përbëjnë një katastrofë, ku më tutje do të përfshihet pashmangshmërisht edhe KFOR.”
“Do të ishte fatale, edhe për gjithçka që është bërë në këto vite, në Ballkanin Perëndimor.
Popujt e Ballkanit Perëndimor duhet të kenë një moment tjetër nga kjo që adreson qorrsokaku i Veriut të Kosovës. Nuk mund të presim me vite që procesi i dialogut të përfundojë”, u shpreh kryeministri Rama.
Rama bëri me dije se i ka dërguar, një letër të dytë Presidentit francez, Emmanuel Macron, kancelarit gjerman, Olaf Scholz dhe presidentit të KiE, Charles Michel për zbatimin medoemos të planit franko-gjerman për normalizimin e marrëdhënieve dy palëshe Kosovë-Serbi.
“Dua t’iu informoj se pardje i kam nisur një letër të dytë, pas asaj të draft-statutit presidentit Macron dhe kancelarit Scholz, për dijeni edhe presidentit të Këshillit Europian Charles Michel lidhur me domosdoshmërinë e një shtyse të re, konkrete, të Francës dhe Gjermanisë si kumbarët e planit franko-gjerman, natyrisht me mbështetjen e Shteteve të Bashkuara në mënyrë që plani franko-gjerman të zbatohet me doemos”, u shpreh Rama.
Discussion about this post