Kryetarja e Kuvendit, Lindita Nikolla, shpesh herë e ka të vështirë të drejtojë seancat e zhurmshme parlamentare, por tenderët “i qep” në qetësi. Këtë herë ajo ka vendosur të ndryshojë mobiljet në zyrat ku pret të ftuarit. Tenderi me objekt “Blerje e pajisjeve dhe mobileve për Qendrën e Vizitorëve” dhe fond limit 215 milionë lekë.
Më dokumentet e tenderit tregohet se me këto para do të blihen televizorë, mbajtëse TV, perde, ndriçues, vazo, gardërobë, mikrofona rafte dhe shumë të tjera. Por një nga produktet që bie në sy është tablete lojërash për fëmijë.
Vetëm Nikolla mund të na shpjegojë se përse i duhen tabletat e lojërave, sepse ne dimë që në Kuvend zhvillohen takime pune me të rritur.
Por, në dokumente nuk jepet asnjë shpjegim për mallrat që do të blihen edhe pse më datë 10 korrik 2023 kur të firmoset kontrata do të zbrazen 215 milionë lekë nga Thesari i Shteti.
Ndërkohë, Nikolla nuk e ka lënë me kaq.
Në të njëjtën ditë parashikohet që të firmosë dhe një kontratë të dytë. Bëhet fjalë për prokurim me objekt “Materiale te ndryshme mirëmbajtje specialisteti higjeno-sanitare”. Me pak fjalë do të blihen produkte për pastrim dhe mbajtjen e higjienës së ambienteve në Kuvend.
“I paska hyrë pastrimit të shtëpisë me themel”, thotë populli. Por, në fakt Nikolla i ka hyrë abuzimeve me themel, sepse edhe për të blerë këto produkte do të shpenzojë 20 milionë lekë. Sigurisht janë shumë para për të blerë solucion për të larë xhamat, aromë për pllakat dhe likuid për duart, por Nikolla nuk pyet fare për shpenzimet.
Akoma më i çuditshëm bëhet fakti pse duhet të zhvillohet një tender për të blerë disa bidonë aromë dhe solucion për të larë duart?!
Mos vallë Nikolla i kërkon me përbërje speciale, sepse janë produkte që mund të sigurohen edhe pa një tender. Gjithsesi, i gjithë misteri i këtyre pikëpyetjeve do të bëhet i qartë kur të shpallen fituesit.
Discussion about this post