Jo vetëm në Tiranë, studentët bojkotojnë mësimin edhe në qytetet e tjera dhe marshojnë në rrugë

Në Tiranë ka nisur protesta që shënon sot ditën e 7, me kërkesë kryesore dorëheqjen e qeverisë dhe kryeministrit Edi Rama.

Protestuesit kanë nisur të grumbullohen në sheshin Skënderbej.

Ndërkohë, në qytetet e tjera, Lezhë, Vlorë, Elbasan, Shkodër një pjesë e gjimnazistëve dhe studentëve kanë bojkotuar mësimin dhe kanë nisur marshimin nëpër rrugët e qytetit.

Të rinjtë e Shkodrës janë ngritur sërish në protestë, duke iu bashkuar revoltës studentore që vijon prej një jave në kryeqytet.

Ata bëjnë thirrje për dorëheqjen e kryeministrit Edi Rama, arrestimin e tij por edhe të liderit të opozitës, Sali Berisha.

“Rama në burg”, “Berisha në burg”, “Rama jep dorëheqjen” janë disa nga thirrjet e të rinjve, ndërsa iu drejtuan me mesazhe edhe policisë.

“Hiqni kapelet” u shprehën ata duke kërkuar t’i bashkohen revoltës.

Edhe të rinjtë në Lezhë kanë bojkotuar edhe këtë të hënë mësimin, duke dalë në rrugët e qytetit në shenjë proteste. Të rinjtë po marshojnë me thirrjet “Rama, jep dorëheqjen!”, ndërsa në terren janë dislokuar forca të shumta policie për të monitoruar situatën.