SPAK ka nisur hetime për një tjetër kryebashkiak në vendin tonë. Bëhet fjalë për kryetarin e Bashkisë së Kuçovës Kreshnik Hajdari.
Hajdari akuzohet se nuk ka plotësuar saktë formularin e dekriminalizimit, duke mos pasqyruar në të një dënim të marrë në Greqi.
SPAK i ka dërguar kërkesë KQZ-së për të marrë një kopje të formularit të dekriminalizimit të kreut aktual të bashkisë jugore të vendit.
Kryebashkiaku i Kuçovës, Kreshnik Hajdari që rikandidoi sërish në këto zgjedhje të 14 majit, kishte reaguar edhe më herët pas disa akuzave dhe lajmeve që tregonin se ai ishte dënuar në Greqi. Ai tha se madje se është hera e parë që mëson se është dënuar nga Gjykata e Janinës.
“Të nderuar bashkëqytetarë të Kuçovës, Sot jam njohur nga mediat për një “Masë edukuese qortimi” që Gjykata e Janinës kishte marrë ndaj meje në vitin 1999 për kalim të paligjshëm të kufirit.
Kjo është hera e parë që unë mësoj për ekzistencën e një vendimi të tillë, për të cilin sidoqoftë do të interesohem zyrtarisht mbi vërtetësinë e tij. Asokohe në moshën 17-vjeçare mora rrugën për të punuar në Greqi si shumë bashkatdhetarë të tjerë, duke lënë pas Shqipërinë e katandisur si mos më keq nga Saliu. Më ndaluan në kufi dhe menjëherë më kthyen pas në vendlindje.
Nuk kam pasur asnjë dijeni për veprimet që ka ndërmarrë më pas në mungesë drejtësia greke ndaj meje. E megjithatë edhe sikur të kisha pasur dijeni, masa qortuese që ka dhënë Gjykata e Janinës nuk ka qenë e detyrueshme nga unë për t’u deklaruar si vendim administrativ. Gjë që përcaktohet shumë qartë në formularin e Ligjit për Dekriminalizimin, më konkretisht pika 7. Thënë këto, kjo nuk është aspak penalizuese për kandidimin tim si përfaqësues i Partisë Socialiste në Bashkinë Kuçovë. Pra, s’ka asnjë pengesë ligjore.
Megjithatë jam i hapur për çdo lloj verifikimi nga agjencitë tona ligjzbatuese ndërkohë që do të vijoj fushatën elektorale për të fituar mandatin e dytë. Kuçova ka hyrë në një rrugë të pakthyeshme transformimi dhe së bashku do të çojmë përpara kantieret e punët e nisura përgjatë mandatit tonë të parë”, shkruan ai.
Hajdari fitoi me vetëm disa vota më tepër se kandidati i Bashkë Fitojmë, Lefter Maliqi, ndërsa votat në Bashkinë e Kuçovës pritet të rinumërohen.
Discussion about this post