GJKKO rikonfirmoi sot masën e sigurisë “arrest me burg” për Albert Pashajn, i arrestuar me urdhër të SPAK si porositës i dy atentateve për vrasjen e Aredin Beharit.
E ndërsa është zhvilluar seanca për masën e sigurisë në GJKKO, mësohet se Pashaj ka mohuar akuzat. Ai ka pohuar se nuk ka lidhje me asnjë nga ngjarjet e ndodhura në 2017 dhe 2019 për të cilat akuzohet.
Në dëshminë para Gjykatës, Pashaj ka pohuar se e njeh shtetasin Henrik Hoxhaj, pasi janë të dy nga e njëjta zonë.
“E njoh pasi jemi nga e njëjta zonë, por nuk i kam dhënë asnjë porosi”, mësohet të ketë deklaruar Pashaj para GJKKO.
Një ditë më parë SPAK njoftoi se ka kryer hetime në kuadër të procedimit penal nr. 75/2022, të regjistruar për veprat penale të “Vrasje me paramendim”, “Vjedhje me armë”, “Vjedhje me dhunë”, “Shkatërrimi i pronës me eksploziv”, “Sigurimi i kushteve dhe mjeteve materiale për të kryer vrasje”, “Mbajtja pa leje dhe prodhimi i armëve, armëve shpërthyese dhe i municionit”, “Grup i strukturuar kriminal” dhe “Pjesëmarrje në grup të strukturuar kriminal” etj.
Pas kryerjes së veprimeve hetimore, me kërkesë të Prokurorisë së Posaçme, Gjykata e Posaçme e Shkallës së Parë për Korrupsionin dhe Krimin e Organizuar me vendimin Nr. 72 datë 25.06.2023 ka vendosur: Caktimin e masës së sigurimit personal “arrest në burg”, parashikuar ndaj personit nën hetim Albert Pashaj, i dyshuar për kryerjen e veprave penale të “Vrasja me paramendim”, e kryer per interes, në bashkëpunim, e mbetur në tentativë, e kryer në dëm të Aredin Beharit dy here, (në datat 05.11.2017 dhe 03.04.2019), në qytetin e Fierit, në bashkëpunim me të hetuarit Henrik Hoxhaj dhe Skerdi Tase.
Nga hetimet, sipas SPAK, rezulton se Aredin Behari, i cili i shpëtoi dy atentateve kishte një konflikt pronësie me porositësin për tregtimin e naftës. Zbardhja e skemës për vrasjen e Beharit është zbuluar pas dëshmisë së Henrik Hoxhajt, që ka pohuar se mori 80 mijë euro bashkë me Skerdi Tasen për të kryer vrasjen. Nga hetimet e prokurorisë ka rezultuar se, biznesmeni Aredin Behari, herë pas herë është vënën nën presion nga vëllezërit Ardian dhe Albert Pashaj, pasi pretendonin se ai nuk kishte shlyer një borxh të vjetër.
Për shkak të presioneve të vazhdueshme, Behari i dha rreth 40% të aksioneve të kompanisë së tregtimit të naftës Albert Pashajit. Por sërish ata pretendonin se ai kishte pa shlyer shuma të tjera monetare dhe për këtë i morën një banesë në qytetin e Fierit. Këtë pasuri Behari e fitoi nëpërmjet proceseve gjyqësore, pasi gjykata e Apelit në Vlorë i njohu atij pronësinë. Sipas SPAK, gjatë kësaj kohe Albert Pashaj pa dijeninë e vëllait tjetër Ardjanit, i ofroi Henrik Hoxhajn dhe Skerdi Tases 80 mijë euro për të ekzekutuar Aredin Beharin. Për shkak se dy atentatet e ndodhura në vitin 2017 dhe 2019 kanë dështuar.
Discussion about this post