Në një intervistë për mediat, kryeministri Edi Rama ka folur për situatën brenda Partisë Demokratike, që sipas tij është një tragjikomedi. Kreu i qeverisë u shpreh se një aset i politikës shqiptare është në shkatërrim e sipër.
Duke folur për “non grata-ën” e Sali Berishës, Rama u shpreh se kjo është një fatkeqësi e madhe për vendin.
“Për me kë jam unë aty, unë nuk jam me asnjërin. Pavarësisht se janë dy tipologji të ndryshmen, të dy janë e njëjta gjë. Kam marrë një vendim me veten, që mos e komentoj këtë historinë e Saliut. Që është më e rëndë sesa duket për vendin tonë. Që një njeri që ka pasur 30 vjet të gjitha, president, kryeministër, lidershipin e një prej dy partive kryesore shpallet non grata nga një vend aleat i Shqipërisë dhe banalizimi ekstrem që i bëhet këtij fakti dhe relativizmi vulgar që i bëhet këtij fakti, është e rëndë kjo për Shqipërinë.
Është një gjë që ka një peshë të madhe në raport me Shqipërinë. Unë e konsideroj një fatkeqësi të madhe që një karrierë politike, edhe për dikë që unë nuk ushqej asnjë simpati të përfundojë me atë gur në qafë dhe ky gur në qafën e një njeriu të kthehet në gur në qafën e një vendi është e tepër për ta banalizuar” – tha Rama.
Rama gjithashtu është shprehur se edhe pse nuk ka simpati për Berishën, është e rëndë që një politikan karriere si Berisha të mbajë një gur kaq të rëndë në qafë.
“Nga ana tjetër është një tragjikomedi që po i ndodh PD. Është si një humor i madh i universit që po ja kthen mbrapsht ato që i ka pasur si sebep për ti rënë në qafë të tjerëve. Unë di që një aset sidoqoftë i politikës shqiptare është në shkatërrim e sipër, Partia Demokratike është në shkatërrim e sipër.
Nëse kjo do më kishte ndodhur mua, ju e merrni me mend se çfarë do të bënte viktima. Unë nuk e bëj të njëjtën gjë. Por një gjë po të them, që është shumë e rëndë që të ketë jehonë sado e madhe apo e vogël është një marrëzi që kjo është një konspiracion i Sorosit apo i forcave të tjera dhe DASH paska vepruar në funksion të një force të jashtëm qoftë ky Sorosi apo dikush tjetër, është çmenduri” – tha Rama.
Discussion about this post