Publikohen pamjet e konfliktit të ndodhur mesditën e djeshme në Vlorë, ku pas një sherri humbi jetën 55-vjeçari Armando Meshau. Autori i dyshuar i krimit, Rei Mete, 33-vjeç, tashmë i arrestuar nga Policia, pritet të dalë ditën e mërkurë para Gjykatës për tu njohur me masën e sigurisë.
Ngjarja ka ndodhur rreth orës 11:45, në ambientet e një kancelarie në lagjen “Hajro Cakërri” në Vlorë.
Siç shihet nga fotoja e publikuar nga JOQ, 33-vjeçari Rei Meta është duke u konfliktuar fizikisht me 55-vjearin Armando Meshau. Pas debatit, Mete e ka goditur dy herë me grusht në kokë Meshaun duke e lënë të vdekur në vend.
Rei Meta ka thënë para policisë, se shkak për sherrin është bërë një shumë parash, që Armando Meshau ia kishte për të dhënë.
“Me Armandon kam pasur një konflikt të hershëm për çështje lekësh. Unë para disa kohësh kisha ndërmjetësuar tek një tjetër person që Armando të blinte një sipërfaqe toke. Ai më kishte premtuar se nëse do të mund të blinte atë tokë, unë do të përfitoja prej tij një shumë lekësh, por që nuk më tha se sa. Pas disa kohësh mora vesh se ajo sipërfaqe toke ishte blerë nga Armando dhe kam shkuar disa herë ta takojë e t’i kërkoja lekët që më kishte premtuar”, ka thënë ai në polici.
Sipas raportimeve, mes autorit të dyshuar dhe viktimës ka pasur një konflikt të pazgjidhur, që ka qenë i mbartur prej mëse 8 muajsh.
Nga hetimet zbulohet se 33-vjeçari kishte ndërhyrë si sekser për një prej pronave që viktima kishte interes, duke i premtuar garanci se do t’i zgjidhte punë.
Rei Meta kishte premtuar zgjidhje për një pronë të Armando Meshaut, duke përdorur emrin e të ëmës, që është anëtarja e KLP-së Nurihan Seiti Meta.
Në këmbim i riu do të përfitonte një apartament që do t’i falej nga ndërtuesi i njohur në qytetin bregdetar. Por, Mete kishte dështuar në rolin e tij si sekser dhe 55-vjeçari kishte zgjidhur çështjen që e shqetësonte duke shfrytëzuar lidhjet me palë të treta.
Pavarësisht kësaj, 33-vjeçari pretendonte se për “punën” që kishte marrë përsipër, 55-vjeçari Meshau duhet t’i falte apartamentin dhe kjo ka nxitur konfliktin mes tyre, i cili u mbyll tragjikisht ditën e djeshme.
I ndjeri kishte refuzuar t’ia kalonte në pronësi apartamentin Rei Metës dhe kur janë përballur në dyert e kancelarisë debati mes tyre ka degjeneruar në fyerje dhe përdorimin e grushteve.
Discussion about this post