Çmimet individuale në futboll, janë një “zonë gri”, me shumë veta që mendojnë se nuk pasqyrojnë shpirtin e vërtetë të këtij sporti si dhe te tjerë që mendojnë se janë indikatori i vërtetë i vlerësimit të një lojtari.
Disa nga këto çmime akordohen në bazë të një analize të detajuar, nga ekspertë të futbollit (trajnerë, kapitenë kombëtaresh, gazetarë sportivë), pork a dhe nga ato çmime që fusin në mes, vullnetin e tifozëve, duke e bërë që të jetë pjesëmarrës, falë votimit telektronik.
Pikërisht fansat, janë bërë faktori kryesor, në garën për çmimin e Tuttosport “Golden Boy”, që jepet për futbollistin e ri më të mirë.
Gara për çmimin e përvitshëm “Golden Boy” ka marrë një kthesë të papritur në këtë edicion. Jude Bellingham është shkëputur nga ndjekësi më i afërt, Alejandro Balde, falë… Taylor Swift. Më saktësisht falë fansave të çmendur të këngëtares së njohur amerikane, të ashtuquajturit “Swifties”.
Ata janë mobilizuar nga një tifoz i Real Madrid, i cili ka bërë të mundur që brenda pak orësh, të mos ketë më garë mes dy pretendentëve kryesorë për të këtë trofe prestigjioz që jepet nga gazeta e njohur sportive italiane dhe që ndër vite ka parë fitues emra si Messi, Aguero, Rooney, Pogba, Mbappe apo Haaland.
Votimi për fituesin bëhet nëpërmjet votave të gazetarëve dhe publikut. Në këtë të dytin, deri në pasditen e të martës ishte Balde i Barcelonës ai i cili po kontrollonte garën.
Por një tifoz i Real Madrid, bëri një lëvizje te papritur duke bërë menjëherë diferencën në favor të britanikut, i cili është pjesë e skuadrës madrilene.
Ai postoi një intervistë të Balde të muajit maj ku deklaronte se nuk i pëlqenin këngët e Swift, duke u kërkuar fansave të saj që të mos e lejonin atë të fitonte.
Kështu, brenda orës 5 të pasdites e deri në mesnatë, votat e Jude Bellingham kaluan nga 30% në 89%, praktikisht duke mbyllur diskutimet për kush do të jetë fituesi në këtë edicion të trofeut sa i përket votimit të publikut.
Discussion about this post