Presioni i elektoratit, por edhe rikthimi i Lulzim Bashës, konsiderohen nga Luçiano Boçi, si shtysa kryesore që solli tryezën e 43 deputetëve të PD-së, e iniciuar nga Gazment Bardhi, dhe që për herë të parë pas dy vitesh përplasjesh, uli bashkë grupimet e drejtuara nga Sali Berisha se Sekretari i Përgjithshëm i PD-së zyrtare.
Në studion e Ditarit në A2 CNN, nënkryetari i Rithemelimit të PD-së, Luçiano Boçi, tha se presioni i elektoratit ka qenë i madh që bashkimi të realizohej.
Boçi tha se deputetët demokratë u angazhuan në largimin e Lulzim Bashës dy vite më parë nga drejtimi i PD-së dhe ata nuk mund të pranonin një rikthim të tij, duke u përulur.
Sipas tij, takimet mes deputetëve duhet të vijojnë dhe kërkoi zgjerimin e frontit opozitar duke u bërë një ftesë për bashkim dhe atyre që janë rreshtuar krah Bashës.
“Ky zgjerim duhet të vazhdojë, komunikimi duhet të vijojë dhe me pjesën tjetër, përveç atyre përjashtimeve. Ka ende koka të nxehta brenda nesh dhe këto duhet të ftohen dhe ky bashkim është i domosdoshëm”, tha Boçi.
Teza e hedhur muaj më parë për nevojën e regjistrimit të një sigle të re nga Sali Berisha pranohet edhe nga Luçiano Boçi se është diskutuar në selinë blu, por ai është skeptik që kjo mund të ndodhë.
“Nuk është se nuk ka pasur debate, diskutime apo propozime për këtë gjë, por unë mendoj jo të dalë dikush dhe të vjedh historinë. Nuk është vetëm vula apo logo, por janë kontributet e shumë demokratëve”, tha ai.
Mbledhjet e radhës së deputetëve demokratë për Boçin duhet të bëhen në seli, pasi sipas tij simbolika është shumë e rëndësishme dhe jep peshë tjetër në luftën përballë qeverisë.
Discussion about this post