Pasi ka mbaruar interpelancën në Kuvend me deputetin e PD, Tritan Shehu, kryeministri Rama është nisur drejt stadiumit Air Albania për të marrë dozën e tretë të vaksinës anti Covid, por në dalje të kuvendit është ndeshur me protestën e tetraplegjikëve.
Duke mos humbur asnjë mundësi, kryeministri nisi shown e radhës ku njejtë si me fermerët ftoi në takim tetraplegjikët, por në pamundësi për të qenë vetë i pranishëm, delegoi ministren Delina Ibrahimaj për të dëgjuar shqetësimet e tyre.
“Nuk mund t’iu marr dot brenda se kam lënë një orar për vaksinën, do t’ju presë ministrja brenda, unë do të flas me ministren dhe do t’ju kthej unë një përgjigje brenda pak ditësh. Nesër do të nisem në një vizitë në SHBA, dhe menjëherë sapo të kthehem prej andej do të takohem me ju. Mos rrini më në shi tani, futuni deri te dera atje dhe do t’ju presë ministrja“, tha Rama.
Të njëjtën gjë kryeministri bëri edhe me fermerët, të cilët i ftoi në takim për të dëgjuar problemet, por nuk iu ofroi zgjedhje duke i premtuar një tjetër takim më formal që nuk është realizuar ende.
Discussion about this post