“Ajo që është para nesh është harmonizimi i qëndrimeve të partive politike, sepse para nesh kemi një vendim jashtëzakonisht të rëndësishëm, që është vazhdimi i integrimeve evropiane të shtetit”, kështu deklaroi sot nga Gjevgjelia, kryeministri i Maqedonisë së Veriut Dimitar Kovaçevski, duke u përgjigjur në pyetjen se a është e mundur një marrëveshje me opozitën OBRM-PDUKM për ndryshimet kushtetuese.
Kovaçevski theksoi se votimi në Kuvendin e Maqedonisë do të thotë votim për sigurimin e së ardhmes evropiane të vendit dhe vazhdimin e procesit të integrimeve evropiane, që varet nga ne.
“Më parë, nëse do të kishim veton nga jashtë, sot për herë të parë mund të vinte vetoja nga brenda shtetit. Megjithatë, le t’i lëmë hapësirë procesit, që secili të shprehë pikëpamjet e tij dhe t’i modifikojë ato sipas interesave të veta dhe të qytetarëve, të cilët me një shumicë dërrmuese mbi 80 për qind duan të jetojnë në një shtet anëtar të BE-së”, theksoi Kovaçevski.
Në pyetjen se a është arritur marrëveshje me OBRM-PDUKM-në për votimin e amendamenteve kushtetuese, Kovaçevski u përgjigj shkurtë se lë hapësirë për marrëveshje dhe që të gjithë t’i moderojnë qëndrimet e tyre./Telegrafi/
Discussion about this post