Ish-ministri Fatmir Mediu ka ndërhyrë LIVE në studion e emisionit “Open” përmes një komunikimi të drejtpërdrejtë, teksa në studio diskutohet hetimi i çështjes së Gërdecit.
Mediu nisi komunikimin duke përshëndetur “trupin gjykues” në studio, të cilët sipas tij janë duke diskutuar diçka në kundërshtim me ligjin, pasi sipas tij parashkrimi i veprës penale të shpërdorimit të detyrës është 10 vjet, ndërsa nga shpërthimi i Gërdecit kanë kaluar 15 vjet.
Ai shtoi se nuk e ka penguar në asnjë moment hetimin dhe pas vitit 2008 nuk ka pasur imunitet për të penguar hetimin e prokurorisë asokohe.
Ai u shpreh se ky rast po bëhet për të ndërtuar një proces gjueti shtrigash dhe se ai ka marrë përgjegjësinë e tij më parë.
“Mirëmbrëma dhe trupit gjykues që keni aty. Këshillat dikur kanë qenë në lagje dhe tani bëhen në media. Çdo gjë që po diskutohet është në kundërshtim flagrant të ligjit. Parashkrimi i veprës penale të shpërdorimit të detyrës është 10 vjet.
Nga Gërdeci kanë kaluar 15 vjet. Sipas Kushtetutës organi ligjbërës është parlamenti. Gjykata duhet t’i drejtohet parlamentit. Nuk ka vetëm një vendim pushimi në 2009, por edhe në 2015 dhe 2018.
Kush e ka penguar hetimin? Pas vitit 2008 nuk kam pasur imunitet. Kush e pengoi hetimin e prokurorisë. Pse hapet pasi është parashkruar çështja?
E dini që Fatmir Mediu dy herë i kanë bërë hetim pasuror dhe nuk kanë gjetur një element të abuzimit financiar? Kanë hetuar edhe për raste të shëndetit familjar në gjithë botën dhe nuk kanë gjetur një element abuzimi financiar.
Ligji për prokurimet publike e përjashton Ministrinë e Mbrojtjes. Shitja e municioneve nuk bëhet me ankand. Ministri i Financave ka votuar asokohe. Nëse mendon se ministri ecën me mendjen tënde… Nuk e kam penguar hetimin ndaj meje dhe nuk kam pasur asnjë pushtet të tillë. Kjo është për të ndërtuar një proces gjueti shtrigash”, u shpreh Mediu.
Ndërhyrja e ish-ministrit të Mbrojtjes ka ardhur pasi kreu i Nisma Thurje, Endri Shabani, u shpreh se të dënuarve për tragjedinë e Gërdecit duhet ti sekuestrohet edhe pasuria.
Shabani u shpreh optimist për punën e SPAK, ku tha se është duke ecur me ritme të ngadalta, por është në drejtimin e duhur.
“Nuk e dimë deri ku do shkojë ky hetim. Niveli më i lartë është te Mediu. Unë kam besim se SPAK do bëjë atë që drejtësia nuk e ka bërë në 30 vite. Burgu nuk vendos drejtësi. Përveç ndëshkimit në nivele të larta duhet edhe konfiskimi i pasurive të personave të implikuar. Është ende fillimi, ka marrë më gjatë seç duhet por kemi parë ministra, deputetët, kryebashkiak në burg. Deri më parë nuk kishim parë. As ‘ish’ zyrtarët nuk i kemi parë në burg. Arrestimet më të rëndësishme janë bërë këtë vit, që kur ka marrë postin Dumani. Ka një zhvillim pozitiv, është pak, por është në drejtimin e duhur”, u shpreh Shabani.
Debati në studio
Shabani: Këtu ka viktima dhe dikush duhet të mbajë përgjegjësi
Mediu: Kur Mediu nuk ndalon dot prokurorinë të bëjë një veprim të paligjshëm, si und të ndalojë të bëjë një veprim të ligjshëm?
Shabani: Ju mund ta ndihmoni drejtësinë me informacion… aty kanë vdekur njerëz që nuk duhet të ishin fare në fabrikë, që nga mosha… ai që është ministër i mbrojtjes ndjen një përgjegjësi pse ka zgjedhur këtë kompani dhe pse aty. Nëse keni pasur presion nga lart, bashkëpunoni me drejtësinë
Mediu: Këto marifete aludimesh shko bëji diku tjetër, jo me mua
Shabani: Nuk ka aksident në një fabrikë ku kishte fëmijë dhe gra
Mediu: Po ju them, e dini sa janë vrarë para Gërdecit nga shpërthimi i municioneve? 140 vetë! Ka pasur ndonjë ministër të japë dorëheqje?
Discussion about this post