SPAK i sekuestron 5.512 m2 truall burrit të Olta Xhaçkës

Prokuroria e Posaçme ka sekuestruar 5512 m2 truall të Artan Gaçit, bashkëshortit të ish-ministres së Mbrojtjes, Olta Xhaçka.

Lajmi konfirmohet nga mediat dhe sekuestro është vendosur për hetimin e falsifikimit të aktit të marrjes së pronësisë mbi tokën.

Gaçi u mor edhe në pyetje disa ditë më parë, pas kallëzimit të kryetarit të zgjedhur të bashkisë Himarë, Fredi Beleri.

Beleri e kallëzoi Gaçin dhe kryebashkiakun Jorgo Goro në SPAK për këtë truall.

Bashkëshorti i ish-ministres gëzon edhe statusin e investitorit strategjik.

Dosja në fjalë lidhet me dhënien e një prone e cila sipas Belerit është tjetërsuar dhe më pas i është shitur Artan Gaçit, bashkëshortit të ish-ministres së Jashtme, Olta Xhaçka.

Beleri akuzon në kallëzimin e tij, kryebashkiakun e Himarës Jorgo Goro, Artan Gaçin dhe ZRVPP Vlorë për falsifikimin që i dha 5512 metra katrorë tokë, familjes Foto Pavllo Mëhilli.

Kjo pronë e cila është tokë truall, u regjistrua në ATMP si tokë bujqësore dhe më pas iu shit Artan Gaçit.

Beleri që është edhe kallëzuesi për këtë çështje akuzon kryebashkiakun Jorgo Goro se ka vendosur një parcelë në një hartë që nuk ekzistonte duke shtuar se edhe numri i pasurisë nuk ekzistonte.