“Kanë të njëjtin surrat”, Korreshi: Do ha grosh tërë muajin, s’do…

Deputeti demokrat Saimir Korreshi ka akuzuar mazhorancën socialiste se po tensionon situatën në Kuvend, madje duke përdorur edhe Gardën e Republikës.

Korreshi, i cili është anëtar i Komisionit të Etikës, tha se garda nuk lejoi deputetë të opozitës të marrin pjesë në mbledhje, duke nisur me Dashnor Sulën, që edhe pse anëtar Garda nuk e lejonte.

“Pse duhet të marrin vendime pa dëgjuar mendimin e kolegëve? Duan ti dënojnë, le ti dënojnë, por ti dëgjojnë. Mendojnë se do të zgjidhin situatën duke përjashtuar me nga 10 ditë deputetët?

Ashtu si dje edhe sot po bënin të njëjtën sjellje, të njëjtin surrat”, tha Korreshi.

Deputeti demokrat tha se mazhoranca po vë gardën e republikës si mur mbrojtës. “Po përplasin gardistët me deputetët, kjo nuk është normale. Na vijnë gardistët na thonë kemi urdhër”, tha Korreshi.

Ai pohoi se mbledhja e Komisionit u zhvendos në sallën e grupit të PS-së, atje ku do të merren vendimet për 7 deputetët, vendim që është në kundërshtim me Rregulloren e Kuvendit.

I pyetur se çfarë do të bëjë nëse vijojnë përjashtimet, Korreshi iu përgjigj pyetjes me një batutë: “po punë e madhe që s’do marrim rrogën këtë muaj. Do ha nga pensioni i plakës, 112 mijë lekë të vjetra e ka, do ha groshë të gjithë muajin”.