Shpërthen depozita e karburantit në Tiranë, dy të lënduar

Një incident është shënuar këtë të shtunë, teksa mbushej një depozitë në një pikë karburanti në Tiranë.

Ngjarja ka ndodhur te rruga Bardhyl dhe sipas informacioneve të para bëhet fjalë për dy të lënduar nga shpërthimi, shoferi dhe një punonjës.

Në vendngjarje kanë shkuar menjëherë forcat e policisë dhe zjarrfikëses.

Policia ka bërë të ditur se autoboti ka qenë duke furnizuar me benzinë karburantin, ndërsa ka pasur një shpërthim që ka dëmtuar menaxherin me inicialet M.Ç dhe shoferi i autobotit me inicialet M.K.

Në njoftimin e policisë thuhet:

Më datë 04.11.2023, rreth orës 13:30, në Rrugën Bardhyl, gjatë kohës që ka qenë duke u furnizuar një karburant me benzinë, nga një autobot, ka ndodhur një shpërthim.

Si pasojë është dëmtuar shtetasi M. Ç., (menaxher) dhe shtetasi M. K. (shoferi i autobotit), të cilët janë transportuar në spital dhe ndodhen nën kujdesin e mjekëve.