Marrëveshja mes Shqipërisë dhe Italisë ka shkaktuar reagime të ndryshme.
Komisioni Evropian thotë se është vënë “në dijeni të marrëveshjes operacionale mes autoriteteve italiane dhe shqiptare” në fushën e menaxhimit të flukseve migratore.
“Ne jemi në dijeni të marrëveshjes operacionale mes autoriteteve italiane dhe shqiptare. Jemi vënë në dijeni për këtë marrëveshje, por ende nuk kemi marrë informacion të detajuar”.
Kështu ka bërë të ditur një zëdhënëse e Komisionit Evropian.
“Ne e kuptojmë se kjo marrëveshje operacionale duhet ende të përkthehet në ligj nga Italia dhe të zbatohet më tej. Është e rëndësishme që çdo marrëveshje e këtij lloji të jetë në përputhje të plotë me të drejtën e komunitetit dhe ndërkombëtar.”
Kryeministri Edi Rama nënshkroi një ditë më parë marrëveshje me Italinë për të strehuar emigrantët e vendeve të treta në Shqipëri.
Kjo marrëveshje është në favor të Italisë, për shkak të mbi ngarkesës që vendi fqinj ka. Në marrëveshje theksohet se emigrantët do të strehohen në Shëngjin, duke nisur nga pranvera e vitit 2024.
Sipas mediave italiane, në muajin gusht pati një vizitë të shpejtë nga Giorgia Meloni tek kryeministri shqiptar.
Pikërisht me atë rast, thonë burime nga Palazzo Chigi, u mbyll në thelb protokolli për menaxhimin e flukseve migratore ndërmjet Romës dhe Tiranës. Marrëveshja kishte mbërritur “gjatë takimit që të dy liderët kishin zhvilluar në atë kohë dhe që ishte cilësuar si një drekë e thjeshtë.
Në vend të kësaj, të njëjtat burime theksojnë se takimi ishte “më shumë se aperitiv” dhe shpjegojnë se marrëveshja do të jetë funksionale duke nisur nga pranvera e 2024-s. Marrëveshja e parë e këtij lloji, shtohet, është një marrëveshje historike jo vetëm për Italinë, por për të gjithë Bashkimin Evropian.
Discussion about this post