Lindita Metaliaj është një nga 3 deputetet që së fundmi u përjashtua për 10 ditë nga punimet e Kuvendit, pas seancës së fundit parlamentare.
Sipas vendimit të marrë nga Sekretariati Etik i Kuvendit, Metaliaj u përjashtua pasi ka mbajtur një nga dy tymueset që u përdorën gjatë seancës nga deputeti i opozitës Saimir Korreshi, edhe ky i përjashtuar.
Nga studio e News24, Metaliaj shprehet se nuk ka pasur asnjë njoftim zyrtar nga Kuvendi mbi vendimin, ndërsa përjashtimin e ka mësuar nga mediat.
““Unë jam njohur me vendimin e përjashtimin përmes mediave, nuk kam asnjë njoftim zyrtar. Është një terr informativ për këtë pjesë. Jemi kthyer në diktuarën e hershme, mungojnë internimet”, tha deputetja e PD.
Ajo i qëndroi vendimit të Grupit Parlamentar të PD se aksioni opozitar do të vazhdojë.
“Ky Parlament ka humbur atë që mund të quhet tempulli i fjalës së lirë. Ne kemi mjetet tona demokratike për të protestuar për këtë të drejtë, që është fjala e lirë.
Ne s’kemi asnjë rrugëdalje tjetër. Ne si qytetarë kemi të drejtën e fjalës së lirë dhe për sa kohë nuk dëgjohemi dhe as nuk na jepet fjala për procedurë, ndaj duhet të kërkojmë llogari.
Flasim për ngritjen e komisioneve hetimore, ato janë e drejtë Kushtetuese. Ne na i kanë rrëzuar këto me urdhër të Ramës. Kemi kërkuar një sërë ngritjesh komisionesh, por na janë mohuar. Ata nuk na kanë lënë asnjë rrugë dhe mënyrë proteste.
Ne do i shkojmë deri në fund kësaj beteje parlamentare. Kjo është një betejë pa kthim, për aq kohë sa na shkelen ne të drejtat, imagjinoni qytetarët e thjeshtë se si shkelen. Mund të marrim çdo vendim ekstrem, nëse do jetë e nevojshme çdo vendimmarrje do e marrim”, tha Metaliaj.
Discussion about this post