Apeli i GJKKO lë në fuqi masën ‘detyrim paraqitje’ për Berishën

Apeli i GJKKO-së ka vendosur këtë të martë mosndryshimin e masave të sigurisë për ish kryeministrin Sali Berisha, i cili do të duhet të paraqitet në prokurori dhe i ndalohet dalja jashtë vendit.

Në përfundim të seancës shyqësore në Apelin e Posaçëm mbrojtësi ligjor i ish- kryeministrit, Sali Berisha, Genc Gjokutaj e konsideroi sërish çështjen politike.

“Kjo çështje mbetet politike, nuk ka lidhje me thelbin është një gërvishtje, Malltezi nuk ka asnjë lloj penaliteti. Është e pamundur që për çështje të tilla të dorëzohet kallëzimi dhe të regjistrohet procedimi penal. Ne do vijojmë procedurën” u shpreh Gjokutaj, ndërsa lidhur me një ashpërsim të masës së sigurisë ndaj ish kryeministrit Berisha për shkak të mosparaqitjes së tij në SPAK, u shpreh se Berisha nuk ka asnjë rrezik për t’u larguar nga vendi.

“Ashpërsimi i masave ka të bëjë me rrezikun e ikjes. Berisha nuk ka rrezik të ikë. Problemi është ligjor, ajo masë rrjedh nga një proces antikushtetues. Gjykata sot shpalli vetëm dispozitivin. Kemi seancë tjetër të enjten. Për humbjen e fuqisë së vendimit beteja do jetë e gjatë, do kryejmë të gjitha procedurat ligjore” vijoi Gjokutaj.

Ndër të tjera mbrojtësi ligjor i ish-kryeministrit, komentoi edhe arsyet e mos paraqitjes së Berishës në SPAK.

“Refuzimi i paraqitjes ka të bëjë me antikushtetutshmërinë. Është trajtuar në mënyrë tjetër ekstra, duke i hequr një nga të drejtat themelore, atë të mbrojtjes në Kuvend. Vendimi i gjykatës është një kopje e keqe e shkallës së parë, që pati durim për të dëgjuar por s’pati guxim për të vendosur”, tha ai.

Më 14 nëntor, avokatët mbrojtës të ish-kryeministrit Sali Berisha dorëzuan në sekretarinë e Gjykatës së Posaçme ankimimin e plotë ku kundërshtohen vendimet për masën e sigurimit personal “detyrim me paraqitje” dy herë në muaj.

Ish-kryeministri Sali Berisha, i cili po hetohet për privatizimin e ish-Kompleksit Sportiv “Partizani”, nuk e njeh vendimin e GJKKO-së për “detyrim paraqitje” dhe nuk është paraqitur në SPAK, pavarësisht lajmërimeve nga Prokuroria e Posaçme.

Javën e kaluar, përmes avokatëve mbrojtës, ai kërkoi shuarjen e masës “Detyrim për t’u paraqitur në policinë gjyqësore” dhe “Ndalim i daljes jashtë shtetit”, por GJKKO e rrëzoi këtë kërkesë.

Të njëjtën kërkesë për shuarje ose zbutje mase dërguan edhe avokatët e Jamarbër Malltezi, i cili është i dyshuar për korrupsion pasiv.