Rreth 70 mjekë që morën pjesë në një festë të madhe Krishtlindjesh në Spanjën jugore kanë rezultuar pozitivë me Covid-19, thonë autoritetet. Shumica e 68 të infektuarve janë mjekë dhe infermierë që punojnë në njësinë e kujdesit intensiv në spitalin rajonal të Málaga. Autoritetet shëndetësore thanë se ata ishin të gjithë në një festë ku morën pjesë rreth 170 persona të mërkurën e kaluar. Të gjithë të ftuarit paraqirën testet negative përpara festës, por pas këtij grumbullimi shumë prej tyre u desh që të izoloheshin. Stafi i infektuar ishte i gjithë i vaksinuar plotësisht dhe nuk po shfaq simptoma, thanë autoritetet shëndetësore. Raportet lokale thonë se mjekët dhe infermierët nga departamentet e tjera në spitalin rajonal të Málaga-s në Andaluzi janë caktuar për të mbuluar kolegët e tyre. Ky rast ka rritur shqetësimet për rrezikun e përhapjes së Covid në ngjarjet sociale gjatë periudhës së Krishtlindjes. Për të zbutur këtë rrezik, autoritetet shëndetësore në Andaluzi e kishin këshilluar stafin e spitalit që të mos merrte pjesë në festat e Krishtlindjeve. Të hënën, kryeministri spanjoll Pedro Sánchez u bëri thirrje njerëzve të qëndrojnë të kujdesshëm ndaj Covid gjatë festave.
“Ne nuk duhet të ulim kujdesin tonë”, u tha ai gazetarëve në kryeqytetin, Madrid.
Ashtu si shumë vende evropiane, Spanja ka regjistruar një rritje të infeksioneve me Covid në javët e fundit, duke rritur frikën për një valë të katërt vdekjeprurëse të rasteve ndërsa afrohen muajt më të ftohtë të dimrit. Ekziston gjithashtu shqetësim në Evropë për përhapjen e variantit Omicron, për të cilin ekspertët kanë frikë se mund të jetë më i transmetueshëm dhe të shmangë njëfarë imuniteti ndaj Covid. Spanja ka raportuar zyrtarisht vetëm disa raste deri më tani, duke përfshirë katër në Ishujt Balearik. Në total, Spanja ka regjistruar rreth 5.1 milion infeksione me koronavirus dhe 88,000 vdekje që nga fillimi i pandemisë. Spanja u godit rëndë nga pandemia në vitin 2020, por situata është stabilizuar që atëherë, kryesisht falë shkallës relativisht të lartë të vaksinimit të vendit. Rreth 74% e popullsisë totale janë vaksinuar plotësisht dhe 9% kanë marrë injeksione përforcuese, sipas të dhënave të fundit. Javën e kaluar, ministrja e shëndetësisë e Spanjës, Carolina Darias, përjashtoi mundësinë e bërjes së detyrueshme të vaksinimit kundër Covid në vend.
“Unë e kuptoj pse vendet me një mbulim të ulët vaksinash po e planifikojnë atë,” tha zonja Darias. “Por në Spanjë, ne jemi një nga vendet kryesore për vaksinim në Evropë dhe në botë”.
Ajo tha se mjete të tjera që përdoren në Spanjë, duke përfshirë “maskat që janë të detyrueshme brenda dhe jashtë kur nuk mund të ruhet distanca e sigurt”.
Discussion about this post