Nga Italia për Kuvendin e Berishës, themeluesi i PD-së: Basha do jetë ende në gjumë

Para stadiumit “Air Albania” është shtuar numri i delegatëve që do të marrin pjesë në Kuvendin e thirrur nga ish-kryeministri Sali Berisha.

Ndue Lugja, student i dhjetorit 1990, dhe themelues i PD, ka ardhur posaçërisht nga Italia për të qenë pjesë në Kuvendin e sotëm. Lugja i cili është shpallur dhe nderi i kombit nga presidenti, për kontributin e tij në lëvizjen e dhjetorit, tha se në 8 vite PD, nuk ka pasur një njeri që ta drejtojë, pasi Lulzim Basha është ende në gjumë.

“Kjo është një ditë e rëndësishme për Partinë Demokratike, sot ne po rikrijojmë partinë demokratike, në këto 8 vite nuk patëm një njeri që të na drejtojnë, ai që ishte për 8 vite është akoma në gjumë. Ai duhet të ishte sot këtu me ne, nëse vërtetë do t’i interesonte PD, por me siguri që do të jetë ende duke fjetur. Kjo e sotmja është ringjallja e shpresës, gjithçka do të ndryshojë në Shqipëri. Kam ardhur nga Italia për këtë takim sot”, u shpreh Lugja.

Më herët, delegatë nga qarqe të ndryshme janë nisur drejt Tiranës për të marrë pjesë në takimin që do të mbahet në stadiumin “Air Albania”.