Kryeministri Edi Rama nuk ka fshehur entuziazmin pas dekretit të Presidentit Bajram Begaj për ligjin mbi Komisionet Hetimore parlamentare. Pavarësisht nga debati që ndezi miratimi i një ligji me votat e mazhorancës socialiste, Begaj dekretoi atë çka i serviri Kryeministri Edi Rama.
Në një reagim në platformën X, Edi Rama shprehet se ka perënduar koha politike kur Presidenti i Republikës bashkëudhëhiqte revolucionet imagjinare kundër qeverisë.
Sipas tij, Shqipëria s’ka asnjë sekondë për të humbur me askënd që “vazhdon me orën e vjetër, duke kërkuar nëpër rrugicat e ngushta të Kuvendit a të zonës rreth tij, rikthimin e kohës së vdekur”.
Pak ditë më parë Presidenti i Republikës, në një dakordësi me mazhorancën e kryesuar nga Edi Rama, tentoi të mbante një fjalim në Kuvend, në një kohë kur opozita proteston pikërisht për të drejtat e mohuara, sikundër shprehet ajo, që ua njeh Kushtetuta, sikundër është ngritja e Komisioneve Hetimore. Bajram Begaj u bë pjesë e lojës politike të Edi Ramës, çka nga opozita u cilësua si një ministër propagande i Qeverisë Rama, që zgjodhi të bëhej palë dhe jo të qëndronte mbi palët, sikundër Kushtetuta e përcakton rolin e Presidentit.
Dhe duket se me dekretimin e një ligji që pritet të ndezë tensionet, Begaj ndoshta i ka kthyer “nderin” Kryeministrit Edi Rama, që e emëroi në Krye të Shtetit, por humbi edhe shansin që të mund të luajë rolin e një burri shteti, që mund të ulë palët në diskutime e dialog, sikundër ka ndodhur në jo pak raste me paraardhësit e tij në Presidencë.
Reagimi i plotë i Edi Ramës:
Ka perënduar me kohë koha politike kur Presidenti i Republikës bashkëudhëhiqte revolucionet imagjinare kundër qeverisë e në dëm të Shqipërisë, duke e përdorur Kushtetutën si koktej Molotov, siç do të mbarojë po njësoj, më shpejt se sa vonë, edhe ora e keqkuptimit të madh të politikës së ditës, mes punës mendore të parlamentarëve dhe aktivitetit fizik të tyre në sallën e Kuvendit të Shqipërisë!
Ky vend është në një kohë tjetër dhe ky vit është kyç për rritjen e mëtejshme të pagave, investimeve publike e atyre private, të brendshme a të huaja, turizmit që në 2023 arriti rekordin fantastik të 10 milionë vizitorëve nga jashtë, e me radhë në çdo aspekt drejt #Shqipërisë2030.
Prandaj Shqipëria s’ka asnjë sekondë për të humbur me askënd që vazhdon me orën e vjetër, duke kërkuar nëpër rrugicat e ngushta të Kuvendit a të zonës rreth tij, rikthimin e kohës së vdekur.
Discussion about this post