Në procesin e anëtarësimit në Bashkimin Evropian, Serbia hapi sot në Bruksel negociatat për një bllok kapitujsh. Në konferencën ndërqeveritare është hapur blloku 4, që ka të bëj me politikën e transportit, energjisë, rrjeteve trans-evropiane, mbrojtjen e ambientit dhe ndryshimet klimatike.
Duke folur në emër të BE-së, Sekretari slloven i shtetit, Gasper Dovzhan, e cilësoi këtë hap si sukses të presidencës sllovene, hap i cili do të ndikojë në dinamikën e procesit negociator.
Megjithatë, shtoi se Serbia duhet të bëj më shumë në reformat e sistemit të drejtësisë, luftës kundër krimit të organizuar dhe korrupsionit si dhe në proceset e brendshme të rasteve të krimeve të luftës.
Nga ana tjetër, presidenti Aleksandar Vuçiç, këtë lajm e ka quajtur si një sukses të rëndësishëm për Serbinë.
“Urime qytetarëve të Serbisë, për reformat që kemi bërë në vitin e kaluar. Sukses i madh dhe i rëndësishëm për vendin tonë. Shumë faleminderit edhe për Ursula von der Leyen, por edhe për të gjitha shtetet anëtare”, ka thënë Vuçiç në një video-mesazh të postuar në Instagram.
Vuçiç tha se po i kërkon qeverisë që të vazhdojë që të përshpejtojë reformat në fushën e sundimit të ligjit, por edhe në të gjitha fushat për të cilat ai ka folur.
Nga Serbia është kërkuar që të ketë rol konstruktiv edhe në dialogun me Kosovën dhe se kjo “do të përcaktojë edhe dinamiken e negociatave të anëtarësimit”. Me hapjen e këtyre kapitujve Serbia tashmë ka të hapur, 22 nga 35 kapituj në procesin e negociatave me Bashkimin Evropian.
Discussion about this post