Anëtarja e Lëvizjes Socialiste për Integrim, Silva Caka ka paralelizuar ngjarjen e rëndë të ditës së djeshme, ku një i ri u vra në market nga një punonjës policie, me vrasjen e njëjtë të një viti më parë të Klodian Rashës.
Nisur nga deklarata e zv.ministrit të Brendshëm, Besfort Lamallari, që u justifikua duke thënë se këto janë fenomene globale, Caka shkruan se shkarkimi nuk është i mjaftueshëm në këtë rast, pasi kjo i nxit strukturat policore duke thënë se është një veprim që ndodh kudo.
“Relativizimi i çështjes, me nota të theksuara spiropalizmi në rastin më të mirë është idiotësia që kaplon çdo zyrtar të pandjeshëm dhe në rastin më të keq është neglizhenca dhe papërgjegjshmëria që kaplon çdo zyrtar që nuk e ka as idenë më të vogël të asaj që përfaqësojnë pozicioni, veprimet dhe fjalët e tij. Shkarkimi është pak në këtë rast; kjo deklaratë nuk parandalon dhe as përcjell mesazhe ndëshkueshmërie tek kolegët e policëve vrasës, përkundrazi i nxit ata, duke i justifikuar se është veprim që ndodh në të gjithë botën”, shkruan Caka.
Sipas saj, kjo ngjarje është një këmbanë alarmi për policinë dhe zgjidhje është reformimi radikal i saj dhe pa kompromise.
Discussion about this post