Vështirësi në aksin Kukës-Peshkopi, trashësia e borës shkon deri në 15 cm

Rajoni i Dibrës është përfshirë nga reshjet e dendura të borës ndërkohë që temperaturat janë ulur ndjeshëm gjatë natës.

Trashësia ka arritur deri në 5 centimetra, kurse në lartësinë mbi 1000 metra mbi nivelin e detit, bora ka arritur deri në 15 centimetra.

Rruga Kukës-Peshkopi kalohet me vështirësi ndërsa në disa njësi administrative si Selishtë, Lurë dhe Kala e Dodës kalimi është vështirësuar ndjeshëm.

Nuk ka probleme në rrugët e qytetit. Akset Qafa e Buallit-Krastë, Ura e Çerenecit, Librazhd dhe Aksi kombëtar Peshkopi-Tiranë, kalimi bëhet pa probleme dhe pa zinxhir.

Nuk ka raportime për ndërprerje të energjisë elektrike.

Aktualisht sipas specialistëve të bujqësisë nuk raportohen dëme në fruti-kultur dhe tek të mbjellat.