Ministri i Brendshëm, Taulant Balla iu shmang një sërë pyetjesh gjatë interpelancës së kësaj të enjteje në Kuvend, të kërkuar nga deputeti demokrat Ervin Salianji.
Gjatë fjalës nga foltorja e Kuvendit, Salianji kërkoi përgjigje nga kreu i Ministrisë së Brendshme për çështjet e nxehta, që lidhen me situatën e krimit në vend.
Megjithatë, gjatë fjalës së tij, kreu i Ministrisë së Brendshme, institucion që ka nën varësi Policinë e Shtetit, më tepër se përgjigje ndaj pyetjeve që ngriti ligjvënësi, bëri një rezyme statistikash, duke e paraqitur nën një dritë pozitive punën e uniformave blu.
Ministri i Brendshëm Taulant Balla përmendi si sukses aksione si “Tempulli” – për goditjen e shpërndarësve me doza të drogës. Gjithashtu, përmendi Lazaratin për të goditur policinë e kohës nën qeverisjen e PD, duke bërë një krahasim të situatës aktuale me më shumë se 1 dekadë më parë.
Në përgjigje, Salianji solli në vëmendje raportet e DASH dhe Prokurorisë së Posaçme, si dhe hetimet e dosjeve si “Metafora”, që nxjerrin në pah kapjen e policisë nga krimi dhe dekonspirimin e aksioneve. “Këta me 3 tonelata nuk keni fuqi ti kapni. Se këta me 3 kg janë për kusur në këtë vend”, u shpreh deputeti demokrat në përgjigje të vlerësimit të ministrit për aksionin “Tempulli” kundër shpërndarësve me doza të drogës. Në përgjigje për krahasimin me Lazaratin, kujtoi ish-ministrin e Brendshëm socialist Saimir Tahiri, për të cilin tha se kanabizoi vendin.
Ministri Balla u mburr edhe me sigurinë, që sipas tij, ndjejnë turistët e huaj që vizitojnë Shqipërinë. “Ka të bëjë me kodin zakonor dhe jo punën e policisë. Puna e policisë është që e gjen tjetrin pasi vriten, dhe pasi kanë rënë në humnerë”, tha Salianji në replikë.
Deputeti dënoi dhe ritmin e ulët me të cilin po ecën vetingu në polici, duke ngritur dyshime se mazhoranca po e përdor politikisht. “Vetëm një emër është shkarkuar, gjithë milionat për të vetuar 300 policisë nga 11 mijë. Po pse se bëni?! se ju intereson që ti keni nën kontroll. E pamë në Shkodër me metamorfozën sesi krimi emëronte policët. Të dyja palët punonin për socialistët për të mbledhur votat”, tha Salianji.
Ai dënoi fshehjes e plagosjes nga policia të bashkëshortit të ministres Delina Ibrahimaj ndaj një varësi të kësaj të fundit. Lidhur me çështjen, ministri ironizoi duke u përgjigjur se “akti më i rënë kriminal në vlerësimin tuaj kishte mbetur një gozhdë”. Në replikë, Salianji u shpreh se “ngjarja e rëndë është mosbarazia para ligjit”.
Deputeti kërkoi përgjigje për krimet e rënda të mbetura pa përgjigje, si zhdukja e Ervis Martinajt, tritoli ndaj prokurorit në Shkodër, apo të shtënat ndaj një televizioni që lanë të vdekur rojën e sigurisë.
“Policia nuk sheh kullat, po bëri ndonjëri ndonjë avlli andej nga periferia, ja merrni shpirtin dhe çoni statikën ashtu siç e doni”, tha Salianji. “Dilni dhe thoni që drejtuesit e policisë janë te grupi i Çiftelisë. Apo vetëm kur ishte koha e PD-së. Zbardhni zhdukjen e Ervis Martinajt, është gjallë apo ka vdekur? E keni në kërkim edhe sot. A keni guxim t’ua thoni familjarëve është gjallë apo jo? Është njoftuar 5 minuta para operacionit policor për arrestimin e tij se siç duket kishte plane të tjera qeveria”, u shpreh ai.
“Keni informacion që ministra nëpërmjet marrin 500 mijë euro për të emëruar shefa komisariatesh që janë në përgjimet e SKY”, pyeti ligjvënësi.
Pyetje, që shqetësojnë qytetarët, megjithatë mbetën pa përgjigje nga ministri i Brendshëm, Taulant Balla.
Discussion about this post