Një nga repartet që do të ndërhyhet nga Besiktas është reparti ofensivë, pasi klubi nga Stambolli do të ndahet me Vincent Aboubakar dhe nuk ka arritur ende marrëveshje me Cenk Tosun për një kontratë të re.
Klubi nga Stambolli, pjesë e të cilit janë Ernest Muçi dhe Milot Rashica, ka vënë në shënjestër edhe sulmuesin e kombëtares kuqezi Mirlind Daku, i cili ka shkëlqyer me Rubin Kazanin.
26-vjeçari i dalë nga futbolli kosovar është një nga sulmuesit më të vlerësuar në Rusi, pasi në 28 ndeshje ka shënuar 10 gola dhe ka asistuar në katër të tjerë.
Besiktas e ka bërë prioritet transferimin e Dakut sipas mediumit turk ‘VseProSport’.
Madje sipas këtij mediumi, drejtuesit e Besiktasit tanimë kanë bërë një ofertë për Dakun, por që nuk janë publikuar shifrat.
Rubin e transferoi gjilanasin për vetëm 1,2 milionë euro, por vlera e tij është shumëfishuar pas paraqitjeve fantastike në elitën e futbollit rus.
Interesim për të kanë pasur edhe skuadrat më të mëdha ruse si CSKA Moska e Zenit st Petersburg, por Rubin ka refuzuar ofertat.
Mbetet të shihet nëse Besiktas do ta bind Rubinin me një ofertë të lartë për Dakun, i cili do të luajë me Shqipërinë në Euro 2024.
Discussion about this post