Është mëkat i madh të shpërdorosh fondet e shëndetësisë, por akoma më e papranueshme kjo që ndodh tek Spitali Psikiatrik i Elbasanit “Sadik Dinçi”. Institucioni është kthyer në një vend që prodhon vuajtje për të sëmurët dhe fitime për biznesmenët. Pavarësisht skemave që zgjedhin drejtorët, prapë me të njëjtët biznesmenë bashkëpunojnë, edhe pse emrat e tyre janë të lakuar për abuzime dhe korrupsion.
Këtë radhë do të raportojmë mbi tenderin me objekt “Shërbim gatimi dhe shpërndarje ushqimi, për Spitalin psikiatrik “DR. Sadik Dinci”, Elbasan” me fond limit 4.7 milionë euro.
Ky prokurim është zhvilluar nga Operatori i Blerjeve te Përqendruara sh.a, që ka si administratore Arlinda Pogajn, vartëse e ministrit të Ekonomisë, Kulturës dhe Inovacionit, Blendi Gonxhja.
Epo, sapo del në skenë emri i Gonxhes, dihet që aferat janë të mëdha. Shohim se tenderi është mbajtur më datë 25 qershor 2024, kur ishte paraqitur vetëm një ofertë nga bashkimi i operatorëve BOE GERTI-1987 sh.p.k & DAJTI PARK 2007 sh.p.k. me vlerë 4.5 milionë euro.
Qysh këtu, nëse do të zbatonte ligjin, Gonxhja duhej të kishte anuluar procedurën bazuar, sepse në mungesë të konkurrencës ndërpritet procesi.
Gonxhja nuk e ka ndjekur ndonjëherë ligjin edhe kur ishte në krye të DPSHTRR dhe as në Bashkinë Tiranë, pra nuk e bën as tani. Më datë 12 korrik 2024, vartësja e Gonxhes ka publikuar kontratën e firmosur me operatorët , sigurisht pa garë.
4.5 milionë euro xhirohen me këtë prokurim, ku nuk përcaktohen specifikisht ushqimet që do të blihen dhe sasitë, por janë emërtuar vetëm si dieta.
Open Data Albania e ka qëndisur tenderin me “Flamurin e Kuq”. Kjo është shenja që tregon riskun e korrupsionit. Pra, monitoruesi është duke na treguar se Gonxhja dhe vartësja e tij po bëjnë skandal me ushqimin e të sëmurëve në këtë spital.
Ushqimet në duart e të korruptuarve
Gjatë viteve që ka shpërthyer skandali, pra deri në vitin 2022, ky tenderi i jepej kompanisë “Olta Sharra” e regjistruar si person fizik. E njohur bashkë me burrin Genti Sharrën për bashkëpunim dhe pjesë e grupeve kriminale. Por në disa prej tenderëve Sharra garonte me firmën MPED-XH GROUP, në të cilën është bashkëpronare me Elgert Laskajn, i cili ka gjetur sërish rrugën dhe ka futur duart e tij në tenderët e spitalit. Ai është pronar i firmës Elgert Laskaj që paraqitet kompaninë fituese të tenderit që po raportojmë.
Kujtojmë se në vitin 2020, kjo agjenci, por në varësinë e Ministrisë së Brendshme, i skualifikoi të gjithë pjesëmarrësit në tenderin e e ushqimit të Burgjeve, vetëm për t’ia dhënë kontratën bashkimit GERTI – 1987 SHPK -OLTA SHARRA PF.
Kontrata mori një “Flamur të Kuq” të madh nga Open Data Albania.
Nga ana tjetër kemi firmën DAJTI PARK 2007 sh.p.k, në pronësi të Lulzim Qefaliajt, i cili është vëllai i politikanit socialist Xhemal Qefalia dhe i Kujtim Qefalisë, Administratorit të Njësisë Administrative Dajt. Madje ky i fundit ka qenë një nga themeluesit e kësaj firme, por tani merret me politikë dhe bashkë me Xhemalin i sigurojnë Lulzimit tenderë me vlera të larta.
Firma në fjalë ka si bashkëpronar edhe Desart Kalanë, i cili është po kaq i përfshirë në këto abuzime. Ky i fundit u fut në këtë kompani pasi babai i tij Ylber Kalaja i dhuroi aksionet, për të fshehur abuzimet e veta.
Ylber Kalaja është i përfshirë në listën e biznesmenëve të dënuar për korrupsion, por sërish mbeten të privilegjuarit e qeverisë.
Më 23 nëntor të vitit 2018, Gjykata e Apelit ka dënuar me 2 vjet e gjysmë burg biznesmenin Ylber Kalaja i cili ka korruptuar zyrtarë të lartë të Drejtorisë së Burgjeve në këmbim të fitimit të tenderave të ushqimeve. Bashkë me Kalanë gjykata ka dënuar edhe ish.zv Drejtorin e Përgjithshëm të Burgjeve Iljaz Labi dhe tre administratorë kompanish.
Bazuar në hetimet, Kalaja ka ndryshuar emrin e kompanisë së tij nga “Vllaznia” në “Dajti Park 2007” dhe pasi u dënua nga gjykata, i ka dhuruar rreth 80% të aksioneve djalit të tij Desart Kalaja dhe pjesën tjetër Lulzim Qefalisë, vëllait të ish- deputetit socialist Xhemal Qefalia.
Kompania vijon edhe sot të fitojë miliona euro tendera nga qeveria, megjithëse pronari i saj është i dënuar për korrupsion.
Nga Fondi Shqiptar i Zhvillimit përmes një bashkimi operatorësh, “Dajti Park 2007” ka fituar 3 kontrata me vlerë 11 milion euro, ndërsa nga bashkia Tiranë ka fituar hartimin e projektit të rindërtimit në zonën e Kombinatit me vlerë 4.5 milionë euro.
Ligji për prokurimet publike ndalon pjesëmarrjen në tendera të kompanive që kanë një ortak të dënuar për korrupsion dhe vepra të rënda penale. Kjo nuk ka penguar që “Dajti Park 2007” të jetë një nga 6 firmat që kanë përfituar më shumë nga tenderat e rindërtimit.
Dhe së fundmi kjo kompani fut duart tek ushqimi i të sëmurëve, sërish me korrupsion, e favorizuar nga Blendi Gonxhe.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post