Demokrati Gazment Bardhi ka deklaruar se moszbatimi i Gjykatës Kushtetuese është një vepër penale dhe prandaj i kërkon SPAK që të marrë masa për kryeministrin Edi Rama dhe kreun e grupit të PS-së, Bledi Çuçi. Reagimi erdhi pasi sot Çuçi njoftoi se socialistët nuk do çojnë në Gjykatën Kushtetuese mandatin e Olta Xhaçës. Për Bardhin, Berisha është në “arrest shtëpie” sepse nuk ka zbatuar një vendim të Gjykatës, dhe i njëjti standard drejtësie duhet të ruhet edhe për Edi Ramën.
“E çon vendin në kushtet e mosbindjes civile, nëse secili prej nesh e lë në gjykimin e tij nëse do të zbatohet një vendim Gjykate, këtu ka rënë shteti demokratik, sot kryetari i PD mbahet prej më shumë se prej 200 ditësh në arrest se pretendohet se nuk ka zbatuar një vendim gjykate, ndërkohë Rama për t’i ardhur në mbrojtje një shoqjeje apo shoku , jo vetëm nuk kanë pasoja të ngjashme, por ia thonë opinionit publik si diçka të normale, prokuroria e posaçme të marrë masa, mos zbatimi i një vendimi të gjykatës Kushtetuese është vepër penale, kjo vepër penale është konsumuar nga përfaqësuesit më të lartë të mazhorancës dhe pres që të ndiqet e njëjti standard, nuk mund të ketë një drejtësi ndryshe për Berishën, dhe një tjetër për Edi Ramën dhe Bledi Cuçin”, tha Bardhi.
Një tjetër pikë e rëndësishme është Reforma Zgjedhore, për të cilën Bardhi hodhi akuza të drejtpërdrejta ndaj kryeministrit Edi Rama. Në një kohë kur kreu i grupit të PS-së, Bledi Çuçi foli për një dakordësi me PD-në, Bardhi tha se Rama nuk po lejon realizimin e një reforme kuptimplotë.
“Kemi ndarë në 2 fashat ndryshimin e Kodit Zgjedhore, faza e parë është Reforma Zgjedhore që Rama i bën bllok nuk lejon realizimin e një reformë kuptimplotë, siç thotë OSBE ODIHR, që do duhet të përfshijë zbatimin e përpiktë të rekomandimeve të OSBE-ODIH dhe faza e dytë është ajo e zbatimit të vendimeve të detyrueshme të Gjykatës Kushtetuese. Ka 3 vendime të Gjykatës Kushtetuese që kanë krijuar boshllëk në Kodin Zgjedhor, që është vota jashtë territorit të Shqipërisë dhe shpërndarja e mandateve, ne kemi shprehur gatishmërinë e plotë të ndërmarrim iniciativën që të plotësohet boshllëku i Gjykatës Kushtetuese”, u shpreh ai.
Deklaratën e tij, Bardhi e mbylli duke ia bërë të qartë mazhorancës se zbatimi i vendimit të Gjykatës Kushtetuese nuk “është i pakushtëzuar me asnjë çështje tjetër sepse përndryshe shembet piramida sesi funksionon një shtet ligjor”.
Discussion about this post