Partia Demokratike e Durrës ka reaguar pas arrestimit të Gazmir Preçit, shefit kundërt trafiqeve në Drejtorinë Vendore të Policisë Durrës, për shantazhin e një biznesmeni.
PD e cilëson turp për qeverinë dhe shtetit emërimin e të tillë personave në poste kyçe.
Në një reagim, PD shprehet se Preçi kërkoi 20 mijë euro për të mos mbyllur një biznes të ndershëm, vetëm se pronari ishte opozitar.
“Si është e mundur që një njeri kaq ordiner, një kriminel me maskën e një shefi policie, të emërohet në krye të trafikut të drogës? Gazmir Preçi, zyrtari që duhej të mbronte qytetarët nga krimi, në vend të kësaj, u kthye në bandit, duke kërkuar 20 mijë euro për të mos mbyllur një biznes të ndershëm vetëm se pronari ishte opozitar! Ky shef i trafikut dhe antidrogës, i cili guxon të shantazhojë dhe kërcënojë biznesmenët e Durrësit, është një turp i madh për këtë qeveri dhe për shtetin! Dy vjet, ky individ i paskrupullt ka vjedhur, ka shantazhuar dhe ka kërcënuar njerëz të ndershëm, nën mbrojtjen e titullarëve të korruptuar që i ngjajnë atij. Si është e mundur që në qytetin tonë, titullarët e institucioneve janë ose trafikantë droge, ose shantazhues të opozitës? Kjo është ajo që ndodh kur bandat kriminale komandojnë policinë dhe emërojnë drejtuesit e saj”, thuhet në reagim.
“Por e kemi një mesazh të qartë për këta kryebanditë: Ne nuk trembemi! Ashtu si kryetari i grupseksionit, Bekim Toro, qëndrojmë ballë për ballë me çdo kriminel që përpiqet të shkelë mbi të drejtat dhe lirinë tonë. Durrësi dhe qytetarët e tij nuk do të bien pre e këtyre kriminelëve që janë vendosur në pushtet për të shërbyer interesat e tyre dhe të bandave që i mbështesin”, shton më tej PD.
Deklarata mbyllet me një mesazh për qytetarët e Durrësit:
“I garantojmë qytetarët e Durrësit dhe të gjithë Shqipërisë: Partia Demokratike e Durrësit nuk do të trembet nga këta drejtues policie ordinerë dhe të korruptuar. Ne do të vazhdojmë me denoncimin e këtyre kriminelëve me uniformë dhe të çdo zyrtari tjetër që tradhton detyrën e tij për të mbrojtur ligjin. Bandat nuk mund dhe nuk do ta drejtojnë qytetin tonë! Ne do të luftojmë deri në fund për drejtësi dhe liri”.
Discussion about this post