Ministrja e Infrastrukturës, Belinda Balluku, mori në varësi të institucionit të saj ujësjellësit në vend për shkak se ata kishin hyrë në borxhe. Pas dy vjetësh, po shohim se detyrimet e këtyre shoqërive si pasojë e abuzimit me fondet që shpërndahen përmes tenderave.
Këtë herë i është vënë gishti buxhetit të Ujësjellës Kanalizime Pogradec. Më datë, 1 gusht 2024 kjo shoqëri ka shpallur garën për tenderin me objekt ‘Mirëmbajtje program faturimi dhe fiskalizimi 2024-2027’. Pra, do të mirëmbahet sistemi i faturimit për qytetarët, por investimet për përmirësimin e shërbimit vazhdojnë të mungojnë.
Në këtë procedurë, fillimisht kanë shfaqur interes për këtë garë dy kompani Kreatx shpk dhe Primus Albania shpk, por për çudi kjo e fundit nuk paraqiti asnjë ofertë ekonomike, duke ngelur kështu e vlefshme vetëm oferta e firmës Kreatx shpk.
Është qartë se ky është një tender fiktiv, sepse pjesëmarrja e konkurrentes tjetër është vetëm për të plotësuar numrin.
Në këto kushte Johan Sterjo, që është administrator i UK, duhej që të anulonte tenderin. Por, me sa duket direktiva e Ballukut ka qenë përmbyllja e kontratës me kompaninë e paracaktuar Kreatx shpk.
Prandaj, pa garë fare dhe pa e zgjatur shumë procedurën, më datë 19 gusht 2024, përfundoi tenderi dhe më 28 gusht u bë njoftimi publik i emrin të fituesit, Kreatx shpk.
Open Data Albania i ka vendosur tenderit ‘Flamurin e Kuq’ për mungesë konkurrence. Kjo është shenja e riskut të korrupsionit.
Kjo firmë do të përfitojë paratë e mirëmbajtjes nga kjo shoqëri deri në vitin 2027. Fituesi nuk ishte një emër surprizë pasi ka lidhur “kontratë” afatgjatë me Ballukun edhe për ujësjellës të tjerë.
Kreatx shpk është akuzuar nga opozita se ka prapa Panajot Gjiknurin, vëllain e Damian Gjiknurit, i cili ka qenë paraardhës i Ballukut në këtë ministri. Kreatx shpk ka fituar edhe tenderët nga UK e tjera si atë të Durrësit, Sarandës, Dibrës dhe Librazhdit.
Në të dhënat e publikuara nga Spending Data rezulton se Kreatx shpk në katër vitet e fundit ka përvetësuar nga buxheti i shtetit 3.4 milionë euro, ku një pjesë e konsiderueshme janë derdhur nga fondet e ujësjellësve!
Kështu, Balluku po e ndihmon Kreatx të krijojë monopol në sektorin e mirëmbajtjes së rrjeteve të faturimit të ujësjellësve në vend.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post