Fredi Beleri u kthye sërish në çështje pasi një ditë më parë u godit me vezë dhe kos nga një protestues, teksa dilte nga ambientet e Kuvendit të Shqipërisë, ku hyri si eurodeputet.
Athina zyrtare ka dënuar incidentin ndaj eurodeputetit Beleri gjatë pranisë në Shqipëri, për takimin e Komisionit Parlamentar BE-Shqipëri për Stabilizim-Asocimin, ku një protestues hodhi ndaj tij vezë e kos. Ministria e jashtme greke u kërkoi autoriteteve shqiptare ndërmarrjen “e menjëhershme” të masave për garantimin e sigurisë së të gjithë eurodeputetëve.
“Ky sulm është një shkelje e papranueshme e respektit dhe sigurisë që u detyrohet përfaqësuesve të zgjedhur të Bashkimit Evropian. Autoritetet shqiptare duhet të marrin të gjitha masat e nevojshme për të parandaluar incidente të tilla dhe të ruajnë lirinë e eurodeputetëve për të përmbushur përgjegjësitë e tyre”, thuhet në deklaratën e Ministrisë së jashtme greke.
Sulmi ndaj Belerit solli gjithashtu reagimin kolegëve të tij nga Demokracia e Re në Parlamentin Evropian. Eliza Vozemberg, duke folur në emër të eurodeputetëve të partisë, shprehu mbështetjen e palëkundur për Belerin dhe theksoi nevojën kritike për të mbrojtur sigurinë e të gjithë përfaqësuesve të Parlamentit Evropian.
“Ne dënojmë me termat më të ashpër sulmin ndaj kolegut tonë Fredi Beleris. Ky incident është një fyerje e drejtpërdrejtë ndaj parimeve të demokracisë dhe shenjtërisë së Parlamentit Europian. Ne u bëjmë thirrje autoriteteve shqiptare të kryejnë një hetim të plotë dhe të nxjerrin autorët para drejtësisë”, tha Vozemberg.
Sulmi u dënua edhe nga opozita. Kryetari i Partisë Demokratike Sali Berisha e quajti një akt banditesk. Sipas tij, sulmi u porosit nga kryeministri Edi Rama.
“Në një akt hakmarrje primitive ndaj Fredi Belerit i cili ndodhet në Shqipëri si anëtar i delegacionit të Parlamentit Europian për Shqipërinë, me urdhër të Edi Ramës, i mbyllën derën e Parlamentit dhe nuk e lanë të futet deri sa erdhi provokatori patronazhist për të agresuar eurodeputetin Beleri. Provokatori pas aktit banditesk u largua i qetë. Me këtë rast dënoj me forcën më të madhe aktin banditesk të porositur nga Edi Rama ndaj eurodeputetit Beleri në detyrë. I bëj thirrje Parlamentit Europian të dënojë aktin e paprecedent ndaj deputetit Beleri të organizuar nga Edi Rama, i cili pasi i rrëmbeu mandatin e Kryetarit të Bashkisë Himarë dhe e burgosi me dëshmitarë të rremë i organizon me banditë agresionin fizik”, shkroi Berisha në një postim në rrjetet sociale.
Edhe vetë Beleri, në një prononcim për mediat greke, fajësoi kryeministrin Edi Rama për sulmin ndaj tij.
“Të gjithë e dinë shumë mirë se është e pamundur që një qytetar t’i afrohet një anëtari të një misioni të muaj…Ajo që bëri Edi Rama ishte e papranueshme nga pikëpamja institucionale. Në një çështje personale nuk më shqetëson aspak sepse sa më vlerëson ai aq edhe unë e vlerësoj”, tha Beleri në një prononcim për mediat greke.
Momenti i shoqërimit
Një ditë pas sulmit, policia shoqëroi këtë të mërkurë protestuesin e cili hodhi vezë dhe kos ndaj Belerit. Ai u lokalizua dhe u shoqërua në ambientet pranë Kuvendit. Pamjet i sjell Gijotina në videon më poshtë.
Në një prononcim para se të shoqërohej, protestuesi përmendi edhe motivet e sulmit ndaj Fredi Belerit, të cilin e quajti vrasës, teksa solli në kujtesë Masakrën e Peshkëpisë.
Disa orë pas shoqërimit, Policia e Tiranës njoftoi nisjen e procedimit penal ndaj tij për dy vepra penale.
“Specialistët për Hetimin e Krimeve të Komisariatit të Policisë Nr. 2 referuan materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, ku filloi procedimi në gjendje të lirë për shtetasin D.N., 61 vjeç, banues në Tiranë, për veprat penale ‘Kanosja’ dhe ‘Prishja e qetësisë publike’, parashikuar nga nenet 84 dhe 274 të Kodit Penal. Ky shtetas, ditën e djeshme, përpara Kryesisë së Kuvendit të Shqipërisë, dyshohet se ka goditur me produkte ushqimore shtetasin F.B., me detyrë eurodeputet. Materialet procedurale i kaluan Prokurorisë, për veprime të mëtejshme”, njoftoi policia.
Discussion about this post