Pas aktit të mosbindjes civile ditën e djeshme, kryetari i Partisë Demokratike Sali Berisha, në një deklaratë për mediat, ka shprehur mirënjohjen për ata që protestuan kundër qeverisë.
Berisha ka theksuar se fitorja më e madhe e ditës së djeshme, “është mesazhi i shpresës që ne i dërguam shqiptarëve, që mbrëmë mendja dhe zemra e tyre ishte tek ne”.
Kryedemokrati u shpreh se po të lexosh raportin e fundit, të projektit botëror të drejtësisë, aty kuptohet se kombi shqiptar është në një pushtim të egër. “Ky është një pushtim që krerët e opozitës i rrëmben, i tërheq zvarrë në burg. Që denoncuesit e krimit i burgos nga frika dhe tmerri i narkodiktatorit prej tyre”, theksoi Berisha gjatë deklaratës së tij.
Gjatë deklaratës për mediat, kreu i PD-së është shprehur se opozita ka ezauruar vetëm 2 nga 77 mënyrat e mosbindjes civile. Ai theksoi se, opozita është e vendosur që të fitojë betejën për qeverinë teknike dhe rikthimin e votës së lirë për shqiptarët.
“Që dje ishin vetëm 3 orë. Por herën tjetër do të jenë 3 ditë. 3 javë po të jetë nevoja. Dhe jo bllokim rrugësh. Por okupim të atyre institucioneve pa të cilat narkoshteti nuk do mund të funksionojë”, paralajmëroi.
“Sapo të fitojmë betejën për qeveri teknike, PD niset pa frena drejt fitores së saj më të thellë, në historinë e saj si forcë politike”, nënvizoi kryetari i Partisë Demokratike.
Discussion about this post