Shkolla ‘Fan Noli’ ka reaguar pas vrasjes së 14-vjeçarit Martin Cani, i cili u godit me thikë në zemër pas një sherri me bashkëmoshatarët. Në një reagim në Facebook, shkolla ‘Fan Noli’ , shkruan se u tronditën nga kjo ngjarje dhe nesër shkolla do të nisë ndryshe pa Martinin.
“Nesër shkolla fillon ndryshe, pa Martinin! Sot u tronditëm të gjithë! Mësues, shokë e shoqe, çdo prind e çdo familje. Dhimbje e papërshkrueshme! 9 vite shkollë me të dhe që nesër në bankë s’do ta shohim më! Qofsh i parajsës, engjëll”, shkruan shkolla ‘Fan Noli’.
I mituri humbi jetën në spital ndërkohë që shoku i tij Luis Meçja është ende duke marrë ndihmë mjekësore. Në një spital privat ndodhet dhe një adoleshent tjetër, i cili dyshohet të jetë autori, ndërsa tjetri është shoqëruar nga policia.
“Shpirti i nënës, shpirti i mamit, ti u bëre mirë, ia hodhe, kaloi çdo gjë!”, këto janë fjalët që Agetina, një grua që u ndodh rastësisht në vendin e ngjarjes i tha Martinit 14 vjeç, i cili u godit me thikë në zemër mesditën e kësaj të hëne, 18 nëntor. Gruaja e mori në makinën e saj për ta nisur drejt Spitalit të Traumës, por Martin Cani nuk ia doli.
I mituri që ëndërronte të bëhej futbollist e humbi betejën për jetën, ndërsa ishte pjesë e ekipit U-15 me Dinamon.
Në konflikt direkt u përfshinë 4 adoleshentë, nga shkolla “Fan Noli”, viktima Martin Cani dhe bashkëmoshatari i tij, shoku i skuadrës Dinamo U-15 ku luanin bashkë, Luis Meçja, i cili mbeti po ashtu i plagosur me plagë në gjoks, dhe po mbahet në kujdes nga bluzat e bardha, nxënës pranë shkollës “Mustafa Qemal Ata Turku” në Sauk, i cili po merr mjekim te Trauma me plagë në gjoks. Në një spital privat në Tiranë, i dëmtuar është një i dyshuar si autor i ngjarjes së rëndë i shkollës “Fan Noli”, ndërsa një shok i tij që ishte pjesë e konfliktit u shoqërua në polici bashkë me disa të tjerë dëshmitarë për të sqaruar konfliktin.
gijotina.com/
Discussion about this post