Zbulohen 8 qendra prostitucioni në Shkodër, procedohen 13 vajza të huaja dhe 2 klientë

Tetë banesa që përdoreshin për ushtrim të prostitucionit nga shtetase të huaja janë goditur pas një operacioni të policisë së Shkodrës.

Blutë e qytetit verior kanë finalizuar operacionin “Payment” pas një punë disa mujore, duke proceduar penalisht 13 shtetase të moshës 22 deri në 42 vjeçe, nga Peruja, Azerbajxhani, Brazili, Mali i Zi dhe Kina.

Po ashtu janë proceduar penalisht dy të rinj shqiptarë banues në Shkodër, të cilët ishin klientë dhe u gjetën në dy banesa të ndryshme.

Gjatë operacionit u sekuestruan në cilësinë e provës materiale 28 telefona të markave të ndryshme, 1 tablet, 1 telekamer dhe një shumë e konsiderueshme parash në lekë euro dhe dollarë të përfituara nga ushtrimi i prostitucionit, njoftuan blutë.

Operacioni dhe hetimet vijojnë për të identifikuar dhe kapur personat organizatorë të shfrytëzimit të prostitucionit.