Bekim Callaku, shqiptar nga Kaçaniku i Kosovës, në gusht të këtij viti u kthye në hero në Danimarkë. Më 11 gusht 2014, teksa po kthehej në shtëpi ai u përball me një skenë agresioni, ku një burrë po godiste një grua në kokë dhe qafë me thikë. Pranë gruas ishte shtrirë një fëmijë i cili gjithashtu ishte goditur me thikë, skenë të cilën ai e ka të ngulitur në mendje që nga ajo ditë.
“Po kaloja në rrugë me makinë dhe pashë një somalez që po sulmonte një grua me thikë në qafë. Unë shkova direkt, dola nga makina dhe e lash makinën ndezur. Kur jam afruar nga gruas, nuk e kam ditur që është në atë gjendje, dhe e kam shtyrë atë personin. Kur e kam parë edhe fëmijën, kam kaluar në gjendje shoku”, deklaroi Çallaku.
Bekim Callaku ka ndaluar automjetin e tij dhe ka vrapuar drejt burrit, ku ka tentuar ta ndalojë, por ka hasur në rezistencë, e madje ka plagosur me thikë në krahë shqiptarin. Por megjithatë ai nuk u dorëzua derisa e neutralizojë tërësisht atë.
“Ajo ka ndenjur në karrocë kur erdhi në gjyq, fëmija ka mbetur i verbër dhe i paralizuar në anën e majtë, por mund të përmirësohet me kalimin e kohës sepse është ende i vogël. Po ashtu, thuhet se ka mbetur edhe me të meta mendore sepse ka derdhur gjak dhe s’ka mundur truri të ushqehet. Kam takuar në gjyq prindërit e gruas dhe më falënderuan, dhe një ditë do të vish të shtëpinë tonë”, tha Bekim Çallaku.
Fatmirësisht gruaja dhe fëmija mbijetuan edhe pse gruaja ndodhet në karrocë, ndërsa fëmija me lëndime në tru. Për këtë akt njerëzor ai u vlerësua edhe nga fondi “Carnegie” për heroizmin duke u shpërblyer me një medalje dhe 20 mijë kurora për heroizmin e treguar.
Discussion about this post