Cigaret elektrike njihen me shumë emra nëpër botë, prej fushatave milionere të marketingut apo videove të atyre që bëjnë ‘lojra tymi’ në Tiktok ose Instagram.
Publiciteti i tyre thotë se cigaret elektrike “nuk janë aq të këqija sa duhani” dhe se njerëzit i përdorin ato për të lënë duhanin.
Por është koha të mësojmë të vërtetën që shpesh neglizhohet nga media dhe përdoruesit, duke mësuar se këto produkte janë vërtet një ide e keqe, shkruan revista shendetesore healthhub.sg
Këto aparate, të njohura në anglisht si “vape” ose “vaping” kanë shkaktuar të paktën 60 vdekje të konfirmuara në SHBA dhe të paktën 2807 raste lëndimi të mushkërive.
Zyrtarët e shëndetësisë në SHBA kanë identifikuar acetatin e vitaminës E, që përdoret në shumë tipe cigaresh elektrike me nikotinë THC, si shkaktar të dëmeve serioze në mushkëri. Kjo ndodh vetëm kur ai thithet në formë vaji dhe jo kur vendoset në lëkurë, shkruan revista shëndetësore Healthhub.
OBSh ka deklaruar se cigaret elektronike ose ‘e-cigarette’ janë padyshim të dëmshme për shëndetin dhe nuk janë një alternativë më e mirë ndaj duhanit.
Këto tymosëse janë produkte të reja në treg dhe nuk ka studime për efektet e tyre afatgjata te zemra apo mushkëria e njeriut, ndërsa mes efekteve afatshkurtra janë miokarditi i zemrës, asma, dhe sëmundjet kronike të mushkërive.
Këto aparate ekspozojnë përdoruesin ndaj substancave të dëmshme kimike dhe agjentëve kancerogjenë si fromalinë, benzen, që dihet që shkaktojnë infertilitet dhe degradim të organeve.
Megjithëse prodhuesit thonë se përbërësit e tyre janë ‘të sigurtë e të padëmshem’, në shumë raste etiketimi “siguri ushqimore” tregon vetëm se ato janë të sigurta për konsum por jo për t’u thithur në mushkëri.
Këto cigare nuk të ndihmojnë të lësh duhanin dhe ende nuk ka studime për sigurinë apo efikasitetin e tyre, prandaj fushatat promocionale kanë shënjestruar të rinjtë, duke bërë lidhjen psikologjike të produktit me lukset materialiste që adhuron klasa e re dhe e paditur e shoqërisë.
Kjo ndodh pasi korporatat e mëdha të duhanit ashtu si grupe të tjera të industrive masive, i njohin mirë taktikat e tyre për të gjeneruar fitime në dëm të shëndetit të popullit.
Por shpesh ato janë paditur për abuzimet siç ndodhi në 2019 me grupin Juul, në SHBA, që reklamonte cigaret e saj elektrike si “99% më të sigurta se cigaret”, apo si “totalisht të padëmshme”.
Ashtu si kolegët e tyre të duhanit të zakonshëm, kompanitë shënjestrojnë të rinjtë që ata të përfundojnë konsumatorë të përjetshëm, duke krijuar reklama joshëse për shijet e tyre të ëmbëltuara.
Cigaret elektrike janë të ndaluara në Singapor, siç është blerja, shitja apo shpërndarja e imazheve të tyre në rrjetet sociale.
37 vende kanë ndaluar shitjen ose shpërndarjen e cigareve elektrike dhe gjithnjë e më shumë vende po shtojnë masat për kontrollin e tyre.
Discussion about this post