Ish-kandidati i opozitës për Bashkinë e Himarës, Petro Gjikuria, ka paraqitur një padi në SPAK kundër të riut socialist, Dasho Veizaj, i cili është bërë i njohur si ‘Petalja më e bukur e trëndafilit socialist’ për fjalimin që mbajti në një konventë rinore të PS. Gjikuria ka vendosur ta padisë Veizaj për zhvendosjen e tij të paligjshme si votues në Himarë. Sipas Gjikurias, qindra persona, përfshirë dhe familjen e tij, u zhvendosën në mënyrë të paligjshme për të mbështetur mandatin e Vangjel Tavos.
Në padinë e tij, Gjikuria përmend edhe emrin e Dritan Shakohoxhës dhe ka paraqitur padi ndaj një sere ministrash që kanë shkelur ligjin duke marrë pjesë në fushatën zgjedhore. Gjikuria gjithashtu kërkon nga SPAK informacion në lidhje me trajtimin e padive të tij të mëparshme.
“Sa kohë që shtetasi Dasho Veizaj, publikisht deklaron se ka lindur dhe është rritur në Lushnjë, ka dyshime të arsyeshme se transferimi prej tij i gjendjes civile në bashkinë Himarë është kryer në shkelje të ligjit nr. 10129/2009 duke përdorur dokumentacion të falsifikuar për të provuar vendbanimin apo qëndrimin e tij në Bashkinë Himarë, me qëllim mbështetjen e një subjekti të caktuar zgjedhor, konkretisht kandidatit të Partisë Socialiste, “petal” i së cilës është edhe ai”, shkruan Gjikuria.
Discussion about this post