Mbi 58 tonë mbetje helmuese janë sekuestruar në portin e Ankonës. Ato ishin gjeneruar nga aktiviteti i dy kompanive italiane me qendër në Lombardi dhe po importoheshin ilegalisht nga Shqipëria. Përfaqësuesit ligjorë të kompanive të përfshira janë denoncuar për krime të rënda mjedisore.
Sekuestrimi i tyre u bë pasi u zbulua se kishte mospërputhje në dokumentacionin që lejonte kalimin.
Sipas mediave italiane, mbetjet kanë përmbajtje alumini dhe një përqendrim të lartë të metaleve të tjerë helmues, si zinku, plumbi dhe bakri.
Ato janë të rrezikshme nëse bien në kontakt me mjedisin ujor dhe mund të dëmtojnë rëndë ekosistemin nëse hidhen apo asgjësohen në mënyrë të pakontrolluar.
Kjo nuk është hera e parë që Shqipëria përfshihet në një skandal të mbetjeve toksike, pasi një hetim vijon të jetë i hapur nga Prokuroria e Durrësit për 102 kontejnerë me mbetje toksike, të nisura nga porti i Durrësit me destinacion Tajlandën.
Discussion about this post